Sämitiggevaaljah uárnejuvvojii 4.9.–2.10.2023, já Sämitige vaaljâlävdikodde tuhhiittij vaaljâi puáttus 4.10.2023. Njuhčâmáánu 27. peeivi 2024 alemus haldâttâhriehti kuittâg meridij, et ive 2023 sämitiggevaaljah kalgeh uárnejuđ uđđâsist, tastko toh iä lamaš laavâ miäldásiih. Suijân toos lii tot, et vaaljâluvâttâlmân iä lamaš merkkejum motomeh ulmuuh, kiäin alemuu haldâttâhrievti mielâst lii vuoigâdvuotâ jienâstiđ sämitiggevaaljâin. Tastko vaaljâi puáttus ij pyevti innig vuoigiđ, te vaaljâid kalga orniđ uđđâsist.
Čohčuv 113 olmožid vaidii alemuu haldâttâhriähtán tast, et vaaljâlävdikodde ij lamaš tuhhiittâm sii ive 2023 vaaljâluvâttâlmân. Alemus haldâttâsriehti tuhhiittij ohtsis 72 väidimid. Miärádâs mield taah 72 olmožid kalgeh tääl merkkejuđ ive 2023 vaaljâluvâttâlmân. Ohtâ väidee keesij väidimis, já loopah hilgojii tâi paccii tuđhâhánnáá.
Sämitige saavâjođetteijee Pirita Näkkäläjärvi mield tile lii tuođâlâš, tastko Sämitiggeest lii ain-uv ennuv pargo Suomâst sarnum kuulmâ sämikielâ, sämikulttuur já puoh sämmilij ärbivuáválij iäláttâsâi oovdân.
– Mij uápásmup alemuu haldâttâhrievti miärádâsân tárkká. Uđđâ vaaljâi räi lii tehálâš visásmittiđ, et Sämitige piäiválâš toimâ puáhtá jotkuđ normaallávt, iätá Sämitige saavâjođetteijee Pirita Näkkäläjärvi.
Jis peri máhđulâš, uđđâ vaaljâi orniimist västid siämmáš vaaljâlävdikodde, mii västidij komettum vaaljâin-uv. Alemuu haldâttâhrievti miärádâs mield Sämitige jesâneh já värijesâneh, kiäh väljejuvvojii komettum vaaljâin, uážžuh juátkiđ tassaažân ko uđđâ vaaljâi puáđus lii tuhhiittum virgálávt.
Alemuu haldâttâhrievti miärádâs mield uđđâ vaaljâin kalga kevttiđ vaaljâluvâttâllâm, mon Sämitige vaaljâlävdikodde tuhhiittij virgálávt kiđđuv 2023. Toos kalga kuittâg lasettiđ taid 72 olmožid, kiäin alemuu haldâttâhrievti mielâst lii vuoigâdvuotâ jienâstiđ sämitiggevaaljâin. Uđđâ vaaljâin ij kuittâg uážu kevttiđ komettum vaaljâin kevttum iävtukkâslisto, tastko vaaljâluvâttâllâm ulguubel pááccám ulmuin ij lah lamaš máhđulâšvuotâ riemmâđ iävtukkâssân.
Uđđâ vaaljah uárnejuvvojeh suullân kyevti mánuppaje keččin alemuu haldâttâhrievti miärádâsâst.
Käldeeh:
– Saamelaiskäräjien vuoden 2023 vaalit on määrätty uusittavaksi (yle.fi)
– AHR: Sämitiggevaaljâid kalga uđâdiđ (www.kho.fi)
Kove: Fabrizio Brecciaroli