Syemmilâš kirječällee Timo Parvela lii iävtukkâssân aalmugijkoskâsii Hans Christian Andersen -palhâšume uážžon. Palhâšuumeest västideijee orgnisaatio IBBY, International Board on Books for Young People, tieđeet ääšist päikkisijđoinis.
Hans Christian Andersen -palhâšume lii enâmustáá áárvustonnum párnáikirjálâšvuotâpalhâšume maailmist. Taat tubdâstem nomâttuvvoo meid ”párnáikirjálâšvuođâ Nobelin”. Palhâšume mieđettuvvoo kirječällei, kiän puovtâdâs lii merhâšitteht vaiguttâm párnáikirjálâšvuotân. Parvela kirjeh láá tobdoseh pirrâ maailm: suu kirjeh láá jurgâlum nyevt 40 kielân, já toh láá aalmugijkoskâsávt vuobdum paijeel kuttâ miljovn pittád. Parvela Ella já skipáreh -rááiđu kulmâ vuosmuu kirje láá jurgâlum meid anarâškielân. Taid lii jurgâlâm FM Henna Tervaniemi. Anarâškielân láá jurgâlum Ella já skipáreh 1 já Ella já skipáreh 2 sehe Ella Laapist. Kiirjijd lii kuástidâm Anarâškielâ servi.
Hans Christian Andersen -palhâšumán asâttum iävtukkâsâin láá väljejum kuttâ finalist. Parvela lasseen finalist kištottâlleh brasilialâš Marina Cosalanti, nuorttâriijkâlâš Heinz Janisch, maadâkorealâš Lee Geum-yi, belgialâš Bart Moeyaert já vuáládâheennâmlâš Edward van de Vendel.
Ton lasseen Hans Christian Andersen -palhâšume keigejuvvoo oovtâ kovvejeijei. Kovvejeijeefinalisteh láá kiinalâš Cai Gao, puolalâš Iwona Chmielewska, brasilialâš Nelson Cruz, espanjalâš Elena Odriozola, kanadalâš Sydney Smith já chilelâš Paloma Valdivia. Suomâ iävtukkâs Linda Bondestam ij olláám finalistij juávkun.
Palhâšume juáhhoo jyehi nube ive. Vuosmuu tove tot juohhui ive 1956.
Parvela lii eromâš tobdos eidu kirjesärjistis Ella ja kaverit. Taan säärjist láá almostum ive 1995 rääjist ohtsis 32 romanid. Anarâškielâ servi juátká rááiđu kirjij kuástidem.
Eres kirjesäärjih Parvelast láá Hilma, Anna ja Antti, Sammon vartijat, Maukka ja Väykkä já Pate.
Hans Christian Andersen -palhâšume finnim iähtun lii tot, et kirječällee puovtâdmeh láá jurgâlum vijđáht maailm sierâ kieláid, vâi aalmugijkoskâsâš tuámárij juávkku pasta árvuštâllâđ iävtukkâs kirjálijd áánsuid.
Tuámárij juávkku váldá palhâšume mieđeetdijnis huámášumán kirječällee ubâ puovtâdem.
Hans Christian Andersen -palhâšume lii puáttám syemmilii kirječällei tuše ohtii talle ko Tove Jansson palhâšui ive 1966.
Käldeeh:
– Hans Christian Andersen Awards 2024 (www.ibby.org)
– Kirjailija Timo Parvela ehdolla HC Andersen -palkintoon (ibbyfinland.fi)
Kove: Ronile (Pixabay)