NASA lii almottâm, et tot maajeed suunâttâllum Artemis II- já Artemis III ‑mánudâšmaađhijd. Taan ive loopân suunâttâllum Artemis II ‑kirdem majeduvvoo čohčâmáánun 2025. Taan kirdemvuárust láá nelji astronaut, kiäh kirdeh Mánudâžân já ton pirrâ mut iä siäivu vala Mánudáá asan. Artemis II ‑vuáru astronauteh láá kanadalâš astronaut Jeremy Hansen já amerikliih astronauteh Christina Hammond Koch (vuosmuš nissoonastronaut mánudâšohjelmijn), Victor Glover (tevkisliiškág astronaut) já Reid Wiseman (Artemis II ‑määđhi komendeijee). Ovtâstum staatâi komovuotâhaldâttuv mield majedem lii velttidmettum teknisij vädisvuođâi keežild.
Artemis III ‑máđháliih, kiäh iä lah vala nomâttum, kolgâččii siäivuđ Mánudáá asan. Taat lâi vuávájum ive 2025 loopân, mut tääl tot lii majedum čohčâmáánun 2026.
NASA hovdâ Bill Nelson tiädut, et astronautij torvolâšvuođâ ferttee prioristiđ. Sun iätá, et mađhij maajeedmáin páácá eenâb äigi teknisij čuolmâi čuávdimân. NASAst láá vädisvuođah rakettáin já Orion-kapseláin. Eereeb iärrás liegâsvuotâsyeji ij lah vala tuárvi kievrâ. Vyerdihánnáá čuolmah ittii meid priivaatirâttâsâigijn, moh toimâtteh komponentijd.
Orionist lâi jo iskoskirdem, Artemis I, ive 2022 loopâst. Talle almaidithánnáá kapsel kiirdij Mánudáá pirrâ kulmâ oho.
Juovlâmáánust 1972 tohhum Apollo 17 ‑kirdem lii taan räi majemuš kirdem, kuás olmooš eelij Mánudáást.
Käldeeh:
– La NASA comparte avances sobre las primeras misiones lunares Artemis con tripulación (www.nasa.gov)
– Maanmissies vertraagd: geen mensen op de maan voor 2026 (nos.nl)
Kove: NASA / Bill Ingalls