Kristin Harila lii taažâsämmilâš kuárŋudeijee já oovdeb čyeigee, kote lii šoddâm Čäcisuollust Taažâ peln. Sun lii kuárŋudâm puoh čuuhijd, moh pajaneh paijeel 8 000 meetter alodâhân. Maailmist toh láá ohtsis 14.
Ive 2021 sust šoodâi pegâlmâs, tastko sun kuárŋudij tagarijd vaarijd ko Everest já Lhotse 12 tiijmest, mii lâi ulâttâs talle ko saahâ lii nisonijn. Tastmaŋa sun lii cuovkkim jieijâs ulâttâs kuohtii. Ive 2022 sun kuárŋudij siämmáid vaarijd váhá paijeel 9 tiijmest, já ive 2023 tuše 8 tiijmest.
Taan ive poođij nubbe-uv ulâttâs, ko Kristin Harila já nepallâš šerpa-uápisteijee Nima Rinji lává kuárŋudâm puoh 8000-meetteersijd vaarijd suullân kuulmâ mánuppaajeest. Harila já Rinji lává peessâm 14 vääri čookán 92 peeivist. Oovdeb ulâttâs tohhui ive 2019. Talle brittilâš Nirmal Purja, kote lii kuittâg šoddâm Nepalist, kuárŋudij 14 čokked 189 peeivist.
Majemužžân Harila já Rinji lává kuárŋudâm K2-nommâsii vääri, mii lii Kiina já Pakistan rääjist. Tot lii maailm nubben alemus vääri Everest maŋa. 17-ihásâš Rinjist lii siämmást šoddâm maailm nuorâmus olmooš, kote lii peessâm K2-vääri čookán.
Käldee:
– Norjalaisnainen ja šerpa tekivät vuorikiipeilyn historiaa (yle.fi)
Kove: WeAreGuides (Pixabay)