Susanna: Mun lam Morottaja Kááisá Ursula Mervi Susanna. Mun jiem veltihánnáá lah aaibâs nuuvt uápis puohháid ko Henna, veikkâ muu nommâ lii sáttám oinuđ Anarâš-loostâ já Lostii peht, maid mun tuájám. Mun lam Kaamasist meddâl, mut tääl mun aasâm Australiast. Mun lam ain tuoijum ennuv, já tääl tot lii meiddei muu pargo. Mun vuáváám kođđeemmaalijd pargonân!
Henna: Uáli maaŋgâs vissâ tobdeh muu, mut iä vissâ nuuvtkin maaŋgâs tieđe, ete mun tuoijuum ennuv. Párnái šoddâm maŋa muu tuoijum lii kale uásild kiäppánâm-uv. Enâmustáá majemui iivij tot lii lamaš, ete mun kuárum já kođám talle ko maidnii lii pággu finniđ valmâšin. Kođđeem lii munjin puoh mielâsumos tääpi luovâniđ aargâst. Nube tááhust tot lii uási muu aargâst. Ennuv mun lam kođđáám Susannan iskoskođemijd. Ko Susanna iävtuttij tyejiblogi, te mun lijjim tiäđust-uv tállân fáárust.
Muái Susannain láán uápásmum Insaku-kuursâst 2017, veikkâ muái tieđijm kale nubijdân jo muuneeld ohtâsij ustevij peht. Susannain munnust lii ohtâsâš rähisvuotâ tuoijuumân, eromâšávt kođemân.
Insaku-ive ääigi muái uásálistijm meid Kansalaisopisto kägismuorâ- já SMK sovskamuvkurssáid. Kägismuorâkuursâst munnust lijjii ovdâmerkkân ullolijne- já vilttičuožžâmeh.
Čuávuváá Anarâš-kalenderân nomâlâssân puátih Susanna kođđeemmaalih. Keesi ääigi lii puátimin vuosmuš iskoskođđeem anarâškielân. Tot lii Susanna Ruuvdu-kaulur, já ton raavâ lii almostum ovdil taam Laine Magazine 52 Weeks of Shawls -nommâsii kirjeest eŋgâlâskielân. Kirje lii jurgâlum meid suomâkielân. Ruuvdu-kaulurân Susanna lii finnim inspiraatio ruuvdukovosij liijnijn. Jis tun lah kiddiistum iskoskođemist, te vääldi peri ohtâvuođâ Susannan čujottâsân Susanna@sannaandco.com.au.
Puátteevuođâst taan blogist munnust lii juurdâ čäälliđ puohlágánijd tuoijuumân kyeskee aašijd. Jis tust láá jurduuh, mast halijdah luuhâđ, te kommentist kiädán vuoluubeln.
Taat blogi kale lii mielâkiddiivâs!
Nuuvt lii 🙂