Tuurki uđđâ presidentin šadda Vuoigâđvuotâ- já ovdánempiäláduv (AKP) nationalkonservatist Recep Tayyip Erdoğan, kote lii lamaš presidentin jo ive 2014 rääjist. Vaaljâi nube jienâstemkeerdist, mii uárnejui vyesimáánu 28. peeivi, sun vuoitij Täsivääldi aalmugpiäláduv (CHP) čižetpiäláduvlii Kemal Kılıçdaroğlu. Erdoğan finnij virgálávt jienâin suullân 52 prosentid já Kılıçdaroğlu 48 prosentid.
Erdoğan finnij jo vyesimáánu 14. peeivi uárnejum vuosmuu jienâstemkeerdist stuárráámuu jienâmere, mut tot ij vala aaibâs pijsám vaaljâi vyeittimân, ko toos ličij tarbâšâm 50 prosentid jienâin já Erdoğan jienah paccii 49,25 prosentân. Vaaljâin láin fáárust meid Memleket-piäláduv Muharrem İnce sehe čoonnâsmettumis Sinan Oğan, kote finnij suullân 5 prooseent jienâin. İnce kiäsádâđâi kištoost já lopâttij kampanjistem muáddi peeivi ovdil vaaljâi, mon tiet suu jienâmeeri lâi tuše suullân 0,5 prooseent.
Veik vaaljâin ij tábáhtum mihheen meendu dramaatlijd, te toh láá finnim meid kritiikijd. Vaaljâi táppájeijee, oppositio iävtukkâs Kılıçdaroğlu naggij, ete Tuurki kyevti stuárráámuu kaavpugist ađai Istanbulist já Ankarast vaaljâvirgeomâhááh iä liččii nonnim puoh vaaljâurnáid já motomeh jienah liččii rekinistum maŋgii. Etyj já Euroop rääđi vaaljâtárkkojeijei mielâst Turkki ij teevdi vátámâšâid demokraatlij vaaljâi orniimân. Sii mielâst Tuurkist iä lah rijjâ mediah, já staatâ tieđettemniävuh láá iänááš Erdoğan já suu piäláduv vaikuttâs vyelni, mon tiet Erdoğan lii lamaš ennuv eenâb positiivlii čuovâst ko eres iävtukkâsah. Ton lasseen vaaljâlävdikodde ij lamaš toimâm tuárvi čoođâčyevveht já oppositio ovdâsteijeeh lijjii vuárnuttum. Positiivlâžžân peellin tárkkojeijeeh oinii kuittâg uáli ollâ jienâstemprooseent, mii vuossâmuu jienâstemkeerdist lâi masa 90 prosentid.
Recep Tayyip Erdoğan lii väldipaajees ääigi sirdám presidentân väldivuoigâdvuođâid, moh ovdil lijjii kuullâm parlamentân já uáiviministerân. Ton lasseen sun lii kepidâm riehtilágádâs jiečânâsvuođâ. Majemui aaigij Tuurki olmoošvuoigâdvuotâtile já jiečânâs mediai toimâ láá moonnâm hyeneeb suundán, já ovdâmerkkân maaŋgah Erdoğan haldâttuv vuástálisteeh láá karttâm faŋgâlân.
Käldee:
– Vaalitarkkailijat: Turkki ei täytä periaatteita demokraattisten vaalien järjestämiselle (www.hs.fi)
Kove: Gerd Altmann (Pixabay)