Kanada prooviins Alberta lii kulluuttâm etitile stuorrâ meccipuálumere keežild. Prooviins uáiviminister Danielle Smith almottij ääšist tieđettemtilálâšvuođâst, mast sun kuvvij tile ”oskomettum kriisin”.
Majemui peivij suullân 25 000 ässed láá karttâm kyeđđiđ aassâmvistees aldaneijee meccipuálui keežild, já vala suullân 5 000 olmožid kärttih evakuistuđ aldemui peeivij. Lávvárduv provinsist rekinistojii 110 meccipuállud, mii lii čiččâm eenâb ko peeivi ovdil. Virgeulmui almottâs mield 36 meccipuállud iä lah maggaargin kontrollist. Koškáduvâi já pakkâs keežild tullâpuálui meeri já vyeimi lii lasanâm.
Ko kuávlun lii kulluuttum etitile, te návt uáiviminister Smith mield provinsist láá eenâb máhđulâšvuođah soottâđ tuulâ vuástá já páguttiđ ulmuid kyeđđiđ aassâmvistees.
Prooviins meccipuáluäššitobdee Christie Tucker mield meccipuálui riskâ lii olluv taan iveääigi. ”Mut tääl mecci lii puállám čuuvtij vijđásub kuávlust ko majemui viiđâ ive ääigi”, sun iätá tieđettemtilálâšvuođâst.
Tucker muštâl, et tääl suullân 122 000 hehtaarid meecijn láá pyelimin, já ovdebái ivij taat vijđodâh lii lamaš suullân 800 hehtaarid. Taan ive jo 350 000 hehtaarid meecist láá puállám, mii taha paijeel vittâ prooseent Alberta ubâlii eennâmvijđoduvâst.
Käldee:
– Alberta declares state of emergency as wildfires rage (globalnews.ca)
Kove: Dennis Larsen (Pixabay)