Jimmy Carter lii sirdum miäđuštemtiipšon, muštâleh Ovtâstum staatâi mediah.
Jimmy Carter teevdij moonnâm ive 98 ihheed, já sun lii tääl puárásumos Ovtâstum staatâi president, kote lii ain elimin. Sun tooimâi Ovtâstum staatâi presidentin oovtâ neelji ive paje ivij 1977–1981. Majemui aigij suu tiervâsvuotâ lii čuuvtij huánánâm, já tääl sun lii sirdum miäđuštemtiipšon, muštâl The Carter Center -siäđus tiäđáttâsâstis. President Carter lii vuáđudâm kuávdáá kálguinis Rosalynnáin. Siäđus oovded maailm ráávhu já tiervâsvuođâ.
– Maaŋgâi uánihis pyecceiviäsust tipšomij maŋa oovdiš president Jimmy Carter lii meridâm viettiđ majemuid peivijdis päihistis jieijâs perruin palliatiivlii tipšoost já joskâđ pyecceiviäsust tipšom. Sust lii suu jieijâs peerâ já tipšotiimi toorjâ, tiäđáttâsâst muštâluvvoo.
Tiäđáttâs ij muštâl suujâ suu tiervâsvuotâčuolmáid.
Carter lii porgâm eellimpargoos noonâ demokratia piälušteijen, já sun lii jotkâm tom puoh háástuin huolâhánnáá. Suu eres juksâmeh láá lamaš suu presidentpaajeest olmoošvuoigâdvuotâkampanjah já Camp David -sopâmuš ive 1978, mii viigâi ive maŋeláá Israel já Egypt ráávhusopâmušân.
Käldee:
– Former US President Jimmy Carter to receive hospice care (www.bbc.com)
Kove: Pexels (Pixabay)