Tovle lâi puoh pyerebeht. Taat ij lah aaibâs tuotâ. Mun kuittâg muštám, ete mist lâi párnážin herskupeivi. Tot lâi áinoo peivi ohhoost ko lâi lope puurrâđ njálgáid já eres heerskuid. Mun ožžum okkoruuđâ, moin mun ostim heerskuid kävppiautost. Ton lasseen sijdiist iä lamaš maaŋgah puđâldâsah. Máhđulávt eidu tondiet puoh ulmuuh, sehe rävisulmuuh já párnááh, lihâdii ennuv. Eellim lâi oovtâkiärdánub talle ko onnáá peeivi, mutâ iäba lamaš maaŋgah pulskes ulmuuhkin. Mun jiem ubâ mušte, ete kihheen ličij rekinistám kalorijd já makroid teikâ murâštâm proteináárvuid mielhist. Onne ulmuuh tietih raavâdáárvuin eenâb ko kuássin, já liijká-uv lijgetiäddu lii stuorrâ čuolmâ.
Párnái lijgepuáidáhvuođâ já lijgetiädu lasanem huolâstutteh. Rävisulmuuh-uv puáiduh Suomâst koskâmiärálávt jotelubbooht ko eres euroopliih. Lijgepuáidáhvuotâ šadda ohtsâškoodán tivrâsin. Ko Suomâst mottoom äšši toovvât čuolmâ, te haldâttâs aaleed teikâ lasseet viäroid tego taam limonaadviäro-uv. Mun ferttiim kuittâg koijâdiđ: iššeed-uv viäro pajedem? Párnááh já rävisulmuuh uástih njálgáid, mäksih toh maid jo mäksih. Ličij-uv pyereeb, jis viäroi saajeest haldâttâs suogârdičij maidnii eres vuovijd čuolmâ čuávdusin?
Ličij-uv Meksiko malli pyereeb muulsâiähtu ko viäroi lasettem? Muu mielâst Meksiko miärádâs, ete škoovlâst ij lah innig lope puurrâđ njálgáid ige sálttáás njälmipittáid, sátáččij toimâđ Suomâst-uv. Vaanhimijn láá meid ovdâsvástádâs čäittiđ ovdâmeerhâ.
Pirrâ Euroop staatah láá riemmâm toimáid, vâi párnááh purâččii tiervâslub purrâmuš. Ovdâmerkkân Portugalist já Taažâst ij innig pyevti máinuđ epitiervâslijd purrâmâšâid párnáid. Suomâst taat lii kuittâg suovvum. Párnááh uážžuh puurrâđ heerskuid škoovlâst, mutâ sij iä uážu kevttiđ kännykijd škovlâpeeivi ääigi. Lii-uv tääl äigi suogârdiđ, maht mij rävisulmuuh uážuččijm taggaar tile, ete puátteevuođâst párnááh purâččii tiervâslubbooht já lihâdiččii eenâb?
Käldeeh:
– Meksiko kiäldá njálgáid já sálttáás njälmipittáid škoovlâst (Anarâš aavis)
– Uutta tietoa lasten ja nuorten ylipainon ja lihavuuden yleisyydestä – toimia lapsen terveen kasvun tukemiseen tarvitaan (thl.fi)
– Suomalaiset lihovat muita eurooppalaisia nopeammin (www.laakarilehti.fi)
Kove: Jaana Kuusela