Kyehti oho tassaaš, kuovâmáánu loopâst, luámusuálui Mallorcast muotij, já virgeomâhááh ávžojii ulmuid pissoođ siste. Tääl šoŋŋâ lii paifakkist muttum: ulmuuh killájeh pakkâ šooŋâst já oceh čuáskudâllâm merâriddoost. Espanjast lii tääl eenâb ko 10 cekkid lieggâsub ko táválávt njuhčâmáánust.
Pasepeeivi (12.3.) Palma de Mallorca kaavpugist mittár čaaitij 27,3 cekkid, mii lii puoh lieggâsumos peivi njuhčâmáánust nuuvt kuhháá ko liegâsvuotâ lii mittedum, ađai suullân 150 ihán.
Espanja šoŋŋâtiäđui mield oovdeb ulâttâs lâi ivveest 1981. Talle njuhčâmáánust mittedui 26,6 cekkid.
Meiddei Valencia kuávlust šoddii uđđâ liegâsvuotâulâttâsah: Castellon de la Plana kaavpugist mittár pajanij 30,8 ciäkán, mii lii 0,6 cekkid eenâb ko oovdeb ulâttâs.
Espanja šoŋŋâtiäđáttâs váruttij tast, et pakkâ šooŋah pajedeh meccipuáluriiskâ. Majemui ivij Espanjast láá lamaš koškáduvah, mondiet meid meccipuáluh láá lamaš enâmist stuorrâ kiksen.
Käldeeh:
– Vakantie-eiland Mallorca bedolven onder pak sneeuw (www.nos.nl)
– Uitzonderlijk hoge temperaturen in Spanje (www.nos.nl)
Kove: Gerd Altmann (Pixabay)
Mielâkiddiivâš suálui tot ”luámusuálui”. Tuáivu mield massaturism ij mute aašijd nuuvt, ete kiinii čáálá puátteevuođâst turistâi luámukuávlu Laapist.