Anarâškielâ seervist lii almostum anarâškielâ párnáimainâsantologia Mainâsij ihe – Čoođâ skaamâ. Kirje siskeeld ohtsis 23 párnáimainâsid, moh láá uárnejum iveääigi mield čohčâkeesist kiiđâ räi. Siijđoin fiäránisteh ovdâmerkkân säpligeh, kuobžah, nuáidih já toontuh. Mainâsij kukkodâh lii táválávt 2–3 siijđo, já teevstâ mieldi láá meid koveh. Kirje loopân láá väridum muáddi siijđo párnáá jieijâs mainâs várás.
Iänááš mainâsijd antologian lii čáállám čällee já radiotoimâtteijee Anja Kaarret. Teevstah láá šoddâm jo ton ääigi ko sun lâi pargoost radiost. Talle Kaarret halijdij, ete meid anarâš mainâseh kullojeh. Puoh pyeremus vyehi finniđ mainâsijd lâi čäälliđ taid jieš. Antologia lii toimâttâm Valtteri Valkeapolku, já Anarâškielâ servi lii finnim Sämitiggeest išeruuđâ kirje kuástidmân.
Párnáimainâsantologia lii uási seervi haavâst finniđ lase anarâškielâg luhâmuš eromâšávt párnáid. Antologia várás pottii nuuvt ennuv mainâseh, ete puoh iä čaahâm oovtâ kiirján. Tondiet Anarâškielâ servi áigu almostittiđ puáttee ive vala nube antologia.
Kirje puáhtá tiiláđ seervi mediapargest (valtteri.valkeapolku@tutanota.com). Tom puáhtá meiddei uástiđ Duodji Shopist Sajosist. Hävskis luuhâmpuudah párnáid, perruid já puohháid!
Kove: Valtteri Valkeapolku