Oulu lii ohtâ tain 25 saajeest, maid ovtâstumstaatâlâš National Geographic ‑lostâ lii valjim ive 2026 puoh pyeremui mađhâšemsoojij listosis. Listo almostui moonnâm oho.
Valjim tyehin lii eromâšávt tot, ete oovtâst slovakialijn Trenčín-kaavpugáin Oulu lii Euroop kulttuuruáivikaavpug 2026. Lostâ muštâl puáttee ive várás sundáttâllum tábáhtusâin já projektijn. Tágáreh láá ovdâmerkkân kuuđâ pisováá taaiđâtyeje ráiđu Climate Clock já arktisijd já páihálijd purrâmušâid fällee Arctic Food Lab ‑ohjelm.
Uásis rammuumist finnejeh eereeb iärrás puárree alne leijee muorâsävni Kesän Sauna, Kauppatori já tom vähtejeijee Toripolliisi-pääcis sehe tot, maht Oulu ovtâstit kaavpugenâduv já luándu.
Oulu lasseen liiston pessii ovdâmerkkân Italia Dolomiiteh, kost uárnejuvvojeh ive 2026 tälviolympialiih, Akagera aalmuglâšmecci Ruandast, Rio de Janeiro kaavpug Brasiliast, Uluru‑ Kata Tjuta aalmuglâšmecci Australiast, Filippiinij uáivikaavpug Manila sehe Banff kaavpug já aalmuglâšmecci Kanadast.
Saahâ meid sämmilijn
National Geographic loptee uáinusân meiddei sämmilijd. Tot maainâš Giellagas-instituut sämikielâi já ‑kulttuur tuárjon já meid tast, ete Oulust ääsih suulân 800 sämmilâžžâd. Ton lasseen lostâ muštâl Riskust adai Räjittes, ellee sämikulttuur ‑ohjelmist, mii kulá kulttuuruáivikaavpugihán.
Riskun kuleh maaŋgâlágáneh ohjelmeh. Dálvemánnu-tábáhtusah čäittih sämmilij ärbivuovijd já tááláá ääigi. Uđđâivemáánu pelimuddoost vyesimáánu aalgâ räi ulmuuh pyehtih uápásmuđ tuáján Oulu taaiđâmuseost Eanangiella-čáitálduvâst. Ovllá-ooppera muštâl sämmilij uáinu staatâ suárdimist.
Käldeeh:
– The best places in the world to travel to in 2026 (www.nationalgeographic.com)
– Oulu, Finland, is finally getting its moment to shine in 2026 (www.nationalgeographic.com)
Kulttuuruáivikaavpugihe nanosmit sämikulttuur Oulu kuávlust
– Sämikulttuurohjelm ulmen lii nube tááhust luptiđ uáinusân mii kulttuur já kulttuuruáivikaavpug kuávlust ässee sämmilijd. Nube tááhust vist mij halijdep pyehtiđ sämmilijd oohtân, faallâđ sämmiláid máhđulâšvuođâid navdâšiđ sämikulttuurist já meid huksiđ já nanodiđ viärmáduvâid, vâi tábáhtusâi ornim puátteevuođâst ličij älkkeb, Risku koordinaattor Aino Valovirta muštâl Kalevan.
Oulust lii jo viehâ ennuv sämikulttuur. Tot já Giellagas-instituut hokâtteleh säminuorâid. Tuoivân lii, ete sämikulttuur páácá Oulust pisovávt eenâb uáinusân kulttuuruáivikaavpugive maŋa-uv.
Käldee:
– ”Saamelaisuus on nyt coolia” – Oulu kasvaa uudeksi saamelaiskulttuurin sydämeksi (www.kaleva.fi)
Kove: Valtteri Valkeapolku