Anarâškielâ servi lii vuáđudâm aavis, mon nommân lii šoddâm Anarâš aavis. Taat 6.3.2023 peeivi versio lii vuosmuš, mii almostittoo puohâi uáinimnáál. Aavis almostit uđđâsijd, moh kyeskih sämikuávlun, Suomân, Skandinavian, Euroopân já ubâ maailmân. Anarâš aavis aldan uđđâsijdis tááhust stuárráábij kielâi aavisijd. Tot peividuvvoo aainâs-uv kulmii ohhoost já almostittoo nettilostân. Tast ij rahtuu pävirlostâ ollágin. Anarâš aavis puáhtá luuhâđ fastâ liiŋkâst: www.anarasaavis.fi. Vuossâmuu numerist láá jo eenâb uđđâseh, nuuvt et luuhâm ij taarbâš algâttiđ kuárus siijđoin.
Aalgâst aavis uđđâseh juáhhojeh tagaráid kategoriaid ko ”Aalmugijkoskâsiih uđđâseh”, ”Ekonomia”, ”Kielâ”, ”Kulttuur”, ”Páiháliih uđđâseh”, ”Politiik”, ”Suomâ”, ”Tieđâ”, ”Ulmuuh” já ”Valastâllâm”. Uđđâ kategoriah pyehtih lasettuđ aaigij mield. Uđđâseh kieđâvušeh puohlágánijd teemaid, om. algâaalmugij suollui vyebdim Chilest, Aanaar kieldâ šleđgâjyehim, Suomâ kuobžânääli kiäppánem jna. Uđđâsijd lii máhđulâš kommentistiđ. Jyehi uđđâs maŋa lii loová, moos puáhtá čäälliđ jieijâs kommentijd. Aavisist lii meiddei uđâsarkkâdâh, mon peht piäsá luuhâđ puáris uđđâsijd. Anarâškielâ servi lii meridâm falâškyettiđ jurgâlem- já kielâtipšompalvâlusâid, já toid puáhtá uápásmuđ Palvâlusah-valjiittuv peht.
Uđđâsij toimâttem algâttuvvoo uccáá navcâigijn, nuuvt et aalgâst uđđâseh väljejuvvojeh já čállojeh toin naalijn, et toh killájeh ucánjáhháá ääigi. Aavis čáálá meid äigikyevdilis aašijn mut ij aalgâst vala tagaráin intensiteetáin ko eenâblovokielâ aavis, main lii stuárráb toimâttâs. Aavis lii nuuvtá luuhâmnáál puohháid, kiäh jo tom halijdeh luuhâđ. Servi tuáivu, et lohheeh aktiivlávt uásálistáččii uđđâsij čokkiimân já čälimân. Aavis almostitmáin servi tuáivu, et tot pastaččij pyerebeht ovdediđ anarâškielâ luuhâm- já čäällimkulttuur.
Anarâš aavis váldutoimâtteijen parga Anarâškielâ seervi mediapargee Fabrizio Brecciaroli. Toimâttâhkoodán kulá suu lasseen Marja-Liisa Olthuis. Pauli Rämö já Tero Riskilä faallâv teknisii torjuu. Puátteevuođâst juávkku vissásávt-uv vijđán.
Luuvâ lase:
– Anarâškielâlâš lostâfalâldâh vijđán: Anarâš aavisist puáhtá luuhâđ uđđâsijd neetist (www.yle.fi)
Kove: Mahesh Patel (Pixabay)