Syemmilâš Joona ”Serral” Sotala lii vuáittám StartCraft II ‑speelâ maailmmiäštárvuođâ. Sun finnij palhâšummeen 200 000 dollarid (suullân 170 000 eurod). 27-ihásâš Sotala lii vuosmuš spellee, kote lii vuáittám maailmmiäštárvuođâ kulmii.
Miäštárvuotâ čovdâšui Esports World Cup ‑kištoost, mii uárnejui Saudi-Arabia uáivikaavpugist Riyadhist syeinimáánu 22.–25. peeivi. Kiišton uásálistii 18 spelled.
StarCraft lii reaaláigásâš scifi-strategiaspellâ, mast spelleeh irâtteh tuššâdiđ vuástálistee toorjâsajattuv. Sij čuággih luánduriggoduvâid já šoddâdeh suátivievâ. Spelleeh tarbâšeh šiev strategia já jotelis suormâid, vâi sij piergiiččii.
Niäljádâsfinalist Sotala vuoitij italialii Riccardo ”Reynor” Romiti 3–2. Pelifinalist sun vuoitij maadâkorealii Kim ”Cure” Doh-wook puttáht 4–0.
Finalist Sotala vuástá poođij maadâkorealâš Kim ”Classic” Doh-woo. Finalist tarbâšuvvojii jo vittâ vuáitu. Sotala moonâi jotelávt 2–0-njunošân já vuoitij fiinaal loppâloopâst 5–2.
– Taat tobdoo mielâttes pyerrin. Mun poottim teehin taan miäštárvuođâ tiet já finnejim tom. Puoh pyeremus tobdo maailmist, Sotala iätá.
Joona Sotala lii StarCraft II ‑speelâ puoh pyeremus spellee. Sun vuoitij maailmmiäštárvuođâ meid iivij 2018 já 2022. Suu lasseen tuše Yoo-jin ”sOs” Kim lii vuáittám eenâb ko oovtâ maailmmiäštárvuođâ (2013 já 2015).
Ive 2019 president Sauli Niinistö povdij spellee Lane juhlijd, moid Sotala uásálistij.
Käldeeh:
– Joona Sotala on maailmanmestari! Voittopotti 170 000 euroa (www.is.fi)
– StarCraft II At EWC 25 Champion: Serral Reigns Supreme (esportsworldcup.com)
– StarCraft II at Esports World Cup 2025 (liquipedia.net)
Kove: bdibbell (cropped, Wikimedia Commons)