Sueye Park, kote šoodâi ive 2000 Maadâ-Korea Daegust, lii vuáittám 13. aalmugijkoskâsii Jean Sibelius -vivlukišto. Helsigist uárnejum kišto aalgij vyesimáánu 19. peeivi. Finaleh uárnejuvvojii Helsig Muusiktáálust 27.–29. peeivi.
Park finnij palhâšummeen 30 000 eurod, nelji persovnlii stivrimkeerdi orkesterjođetteijee John Storgårdsist já vivlučuojâtteijee Pekka Kuusistost sehe vuoigâdvuođâ kevttiđ G.B.Guadagnini 1777 ex Sasson -árvuviivlu oovtâ ive ääigi.
Nubben kištoost poođij jaapaanlâš Minami Yoshida, kote finnij 20 000 eurod. Sun vuoitij meiddei 2 000 eurod pyeremuu Sibelius vivlukonserto oovdânpyehtimist. Kuálmádin lâi ovtâstumstaatâlâš Claire Wells. Sun finnij 15 000 eurod.
Finalân uásálistii meid Gabrielle Després, Otto Antikainen já Amia Janicki. Juáháš sist finnij 3 000 eurod. Janicki vuoitij meiddei 2 000 eurod pyeremuu tiilájum tyeje oovdânpyehtimist pelifinalist. Taan ive tiilájum tyeji lâi Outi Tarkiaisii The Seasons Remembered. Tot muštâl muštokuuvijd tast, magareh iveääigih ovdil lijjii já maht iveääigih oroh tääl ereslágánin šoŋŋâdâhnubástus tiet.
Puoh artisteh, kiäh pessii finalân, uážžuh máhđulâšvuođâ toimâđ syemmilij orkesterij solistin.
John Storgårds jođettem tuámmárkoodán kullii orkesterjođetteijee já vivlučuojâtteijee Jan Söderblom sehe vivlutaidâreh Elise Båtnes, Levon Chilingirian, Jinjoo Cho, Sung-Ju Lee já Réka Szilvay.
Jean Sibelius -vivlukišto annoo stuorrâ áárvust
Jean Sibelius -vivlukišto uárnejui vuosmuu tove ive 1965 ađai čyeti ihheed Jean Sibelius šoddâm maŋa. Tot uárnejuvvoo jyehi viiđâd ive. Kišto annoo stuorrâ áárvust pirrâ maailm. Tom láá vuáittám maaŋgah pegâlmâs čuojâtteijeeh tego Viktoria Mullova, Leonidas Kavakos já Sergei Hatšatrjan.
Jean Sibelius -vivlukišto áinoo syemmilâš vyeittee lii Pekka Kuusisto, kote vuoitij tom ive 1995 tuše 19-ihásâžžân.
Käldeeh:
– Sueye Park on voittanut XIII kansainvälisen Jean Sibelius -viulukilpailun (sibeliuscompetition.fi)
– Kansainvälisen Jean Sibelius -viulukilpailun voitti eteläkorealainen Sueye Park (yle.fi)
– The Seasons Remembered (2024) (www.wisemusicclassical.com)
– Otto Antikainen selvisi ainoana suomalaisena jatkoon Sibelius-viulukilpailussa (yle.fi)
Kove: Frinck (Wikimedia Commons)