Netumbo Nandi-Ndaitwah lii vuáittám Namibia presidentvaaljâid. Sun lii 72-ihásâš politikkár, kote vuoitij 57 prosentid jienâin, nuuvt et nubbe jienâstemkerdi ij tarbâšum. Sun tuáimá tääl väripresidentin, já sust šadda Namibia vuosmuš nissoonpresident.
”Namibia ässeeh láá valjim ráávhu já stáđásmem”, sun eeđâi vaaljâi vuáittusavâstis.
Namibia čuolmân lii ollâ pargottesvuotâ. Enâmist láá meid huollân korruptio já epitäsiárvu. Kampanjas ääigi Nandi-Ndaitwah lopedij presidentin eenâb ruuđâ kievhis párnáid já pargottes nuoráid.
”Ep mij innig loppeed já addel ulmuid puástutuoivuu. Mij porgâp, maid mij ettâp”, sun eeđâi.
Esken väljejum president piäládâh, Swapo, lii lamaš vääldist ton maŋa ko Namibiast šoodâi jiečânâs staatâ ive 1990. Namibiast láá paijeel 2,6 miljovn ässed, já taat eennâm lâi paijeel 30 ihheed Saksa sirdoeennâm, mon maŋa tot kaartâi Maadâ-Afrik apartheidhaaldâšmân.
Presidentvaaljâin Swapo tarbâšij 49 saijeed, já tot vuoitij 51. Vuáittumarginaal lâi tastoo minimaallâš. Presidentvaaljâin lijjii meid teknisiih vädisvuođah, já meid jienâstemliipuh lijjii vääniht. Tágárij vädisvuođâi keežild jienâstemsajeh pissuu kuhheeb áávus.
Oppositiopiäláduvah näggejeh, et jienâstemääigi kuhedem ij lah lamaš vuáđulaavâ miäldásâš toimâ já et maaŋgah namibialiih iä puáhtám jienâstiđ teknisij vädisvuođâi tiet. Motomeh piäláduvah láá aalgâtmin lahâproosees, mii loppâloopâst komettičij vaaljâpuáttus.
Namibia lii nubbe eennâm Afrikist, mii finnee nissoonpresident. Taan räi tuše Tansaniast lii nissoonpresident.
Käldee:
– Namibië krijgt voor het eerst vrouwelijke president (nos.nl)
Kove: World Intellectual Property Organization (Wikimedia Commons)