Pelifinalijn čuávdoo tot, et kiäh taištâleh euroopmiäštárvuođâst syeinimáánu 14. peeivi finalist.
Niäljádâsfinalij vuosmuu speelâst Espanja speelâi Saksa vuástá syeinimáánu 5. peeivi Stuttgartist. Tijme 19.00 álgám spellâ lâi uáli jo jiäráskittee aalgâ rääjist. Saksalâš koskâkieddilegenda Toni Kroos suojâi espanjalii täsnilopádâs Pedrin nuuvt korrâsávt, et Pedri lammâšui já kaartâi lopâttiđ speelâ tállán. Pedri uážui suáibutmist iidâváádu, ige sun pyevti innig spellâđ tain kištoin ollágin. Pedri lammâšume lii Espanjan stuorrâ čuolmâ, já Kroos lii maŋeláá áánnum feeilâs addâgâs.
Espanjalâš volliitteijee Dani Olmo čievčâstij moolâ 51. minuttist. Spellâ oroi lemin vuáittu Espanjan, ovdilgo nuorâ saksalâš täsnispellee Florian Wirtz tassij speelâ nubben majemuu minuttist. Spellâ moonâi jotkâááigán Wirtz moolâ tiet. Jotkâääigi nubben majemuu minuttist espanjalâš Mikel Merino kuittâg čievčâstij moolâ já toin naalijn visásmitij Espanja vuáitu.
Kuábbááh-uv juávhuh spellii aggressiivlávt ubâ speelâ, já tuámmár juovij-uv ohtsis 13 fiskis korttâd. Espanjalâš Dani Carvajal uážui joba ruopsis koortâ speelâ majemuu minuttist. Spellâ lâi Saksa já Real Madrid täsnispellee Toni Kroos jyelgipállukarrieer majemuš spellâ.
Maŋeláá siämmáá eehid spellui Portugal–Ranska. Tot aalgij tijme 22.00. Taangin speelân ij kavnum vyeittee eidusii spellâmääigi, ađai spellâ moonâi jotkâááigán. Kuábáškin juávkku ij peessâm pääččiđ moolâ jotkâääigigin, já nuuvt speelâ koolgâi čuávdiđ ráŋgáštâsčiehčâmijguin. Portugal kuálmád čievčâsteijee, supertäsni João Félix, čievčâstij páálu stuálpun. Ranska puoh čievčâsteijeeh vuod paččii moolâ, já tondiet Ranska vuoitij speelâ.
Espanja já Ranska vuáituh merhâšeh tom, et Espanja já Ranska láá vuosmuš pelifiinaalpaarâ. Espanja já Ranska koskâsâš pelifiinaal spiälloo syeinimáánu 9. peeivi tijme 22.00.
Syeinimáánu 6. peeivi-uv spiällojii kyehti speelâ. Vuosmuš tain, Sveicci–Eŋland, aalgij tijme 19.00 Düsseldorfist. Speelâst ij tábáhtum ennuv ovdil 75. miinuut, kuás sveiccilâš Breel Embolo paajij moolâ. Vittâ miinuut maŋeláá eŋlandlâš Bukayo Saka tassij speelâ uđđâsist. Taat-uv spellâ moonâi jotkâááigán, já ton maŋa tarbâšuvvojii vala ráŋgáštâsčiehčâmeh. Eŋland spelleeh čievčâstii puohah moolâ, mut Sveeici vuosmuu čievčâsteijest tot ij luhostum, já nuuvt Eŋland kočâttij Sveeici EM-kištoin.
Syeinimáánu 6. peeivi nubbe spellâ, Holland–Turkki, aalgij Berlinist tijme 22.00. Turkkilâš piälušteijee Samet Akaydin čievčâstij moolâ 35. minuttist. Holland ij kuittâg adelâm piärán. Holland piälušteijee Stefan de Vrij tassij speelâ 70. minuttist. Kuttâ miinut maŋeláá turkkilâš Mert Müldür čievčâstij jieijâs moolâ, já nuuvt Holland vuoitij speelâ.
Nubbe pelifiinaal lii Eŋland–Holland, mii spiälloo syeinimáánu 10. peeivi tijme 22.00.
Pelifiinaal juávhuin Eŋland lii áinoo, mii ij lah kuássin vuáittám euroopmiäštárvuodâ. Espanja lii vuáittám tom kulmii, Ranska kuohtii já Holland ohtii. Eŋland lâi kale finalist moonnâm kištoin, mut tot táppái ráŋgáštâsčievčâstmijn Italian.
Pelifinaleh spiällojeh syeinimáánu 9. já 10. peeivi tijme 22.00, já fiinaal spiälloo syeinimáánu 14. peivi tijme 22.00. Puoh speelah čáittojeh Yle TV 2 -kanavast já Yle Areenast.
Käldeeh:
– EM-kisat huipentuvat – tässä loppuohjelma (www.hs.fi)
– Fixtures & results (www.uefa.com)
– Toni Kroos apologises for injuring ‘great player’ Pedri in Germany defeat: ‘Not my intention’ (www.independent.co.uk)
Kove: Arne Müseler (Wikimedia Commons)