OA olmoošvuoigâdvuotâkomitea lii registeristám Sämitige stiivrâ puoh jesânij olmoošvuoigâdvuotâväidim, mii kuáská Suomâ alemuu haldâttâhrievti (AHR) miärádâssáid Sämitige vaaljâluvâttâlmist já sämitiggevaaljâi uđđâsist orniimist. Nuuvt čáálá Sämitigge tiäđáttâsâstis.
OA olmoošvuoigâdvuotâkomitea pivdá Suomâ staatâ kiäsádâttâđ puoh mavsâttemtooimâin väidim tahhei háárán talle ko sij kevttih vuoigâdvuođâid, maid aalmuglâš pooliitlâš sopâmuš tuálá sistees já moh lohtâseh komitean tohhum väidimân já nuuvt kuhháá ko komitea lii kieđâvušmin sii väidim.
”Taat lii merhâšittee uuđâs. OA olmoošvuoigâdvuotâkomitea ana sijjân oovdânpuohtum materiaal tááhust taarbâšlâžžân visásmittiđ, ete mavsâttemtooimah iä tábáhtuu vaaljâluvâttâllâmääši já uđđâsist ornimnáál vaaljâi ooleest. Mavsâttemtooimah láá kieldum olgoštemhäämi, já tagarin puáhtá taan ääšist muu uáinu mield anneeđ ovdâmerkkân rikostutkâm, poolis páguttemvuovijd já rikosášáskuttem”, iätá Sämitige saavâjođetteijee Pirita Näkkäläjärvi.
Näkkäläjärvi lii kijtolâš OA:n tast, ete tot adelij vuod smavvâ tuáivu tast, ete juátkojeijee olmoošvuoigâdvuotâsopâmušâi luávkkáámeh Suomâst Sämitige vaaljâluvâttâllâm háárán váldojeh tuođâst.
OA tuotâvuođâ, vuoigâdvuođâ já puáráttâs spesialraportistee Fabian Salvioli pajedij mavsâttemtooimâi máhđulâšvuođâ, ko sun kollij Suomâst kiđđuv.
Salvioli huolâstui njuhčâmáánust uđđâsist, mon mield ”poolis totká, ete láá-uv Sämitige vaaljâlävdikode jesâneh sujâliih rikosân, ko sij láá heiviittâm sämitiggelaavâ aalmugijkoskâsij olmoošvuoigâdvuotânormij mield.” Jieijâs ciälkkámušâst njuhčâmáánust Salvioli muštâlij meid, ete sun lii ”tuođâi huolâstum tast, ete rikosášáškutmijd puáhtá kevttiđ monniilágán mavsâttemtoimân sämmilii algâaalmug vuástá, ko sij kevttih jiešmeridemvuoigâdvuođâs jieijâs identiteet já jeessânvuođâ miäruštâlmist.”
Käldeeh:
– OA olmoošvuoigâdvuotâkomitea pivdá Suomâ staatâ kiäsádâttâđ mavsâttemtooimâin Sämitige valjâluvâttâllâmääšist – Stiivrâ jesânij olmoošvuoigâdvuotâväidim registeristum (samediggi.fi)
– Finland must address legacy of human rights violations against Sámi people, says UN expert (www.ohchr.org)
Kove: Sämitigge