Suomâ lii finnim 13. president, ko presidentvaaljâi vyeittee Alexander Stubb adelij ovdâskode oovdâst juhlálii lopádâs. Viirgánlavkkim aalgâst virgees kyeđđee president Sauli Niinistö já viirgán lävkkejeijee president Alexander Stubb sirduin Presidentlanneest ovdâskoodán. Virgees kyeđđee president Niinistö tärhistij kunneekomppania majemuu tove, já ton maŋa presidentkyevtis sirduin siisâ Ovdâskoddetáálun.
Ovdâskode tievâsčuákkim aalgâst president Niinistö toolâi saavâ:
”Puoh lii muttum. Ige mihheen lah muttum. Mij eellip uđđâ äigipaje. Tääl ulmui mielâin suáti, ráávhu já torvolâšvuotâ tiäduttuvvojeh. Áárvustonnum čuávvom! Aalmug kuoskâttâs. Tom Tun-uv lah kuáhtám vaaljâkiedijn. Kampanja monâdijn tot ilosmit já movtijdit, njaavhâd-uv. Mut šadda árvu, mii kuáđá pisováá luodâs, alfáárug čieŋâlmittee tobdo. Sij luottii munjin. Mun lam tast kiddâ. Taam Tun puáđáh tubdâđ: aalmug kuoskâttâs ij vájálduu. Jieččân aalmugân mun halijdâm celkkiđ lieggâ kijttosijd. Muu uássin lâi finniđ tii lieggâ kuoskâttâs. Tunjin, mii uđđâ president: mij lep Tuu fáárust.”
Tastoo viirgánlävkkejeijee president Stubb adelij vuáđulaavâ 56. ceehist nomâttum juhlálii lopádâs:
”Mun Cai-Göran Alexander Stubb, kiäm Suomâ aalmug lii valjim Suomâ täsivääldi presidentin, vuárnum, et mun presidenttoimâstân vyeligávt já oskolávt nuávdittâm täsivääldi staatânjuolgâdus já laavâid sehe puoh navcâidângijn ovdedâm Suomâ aalmug miänástume.”
Stubb viirgánlavkkimlopádâs maŋa ovdâskode sahâalmai Halla-aho oovdânpuovtij tiervâttâs uđđâ täsivääldi presidentân.
Ton maŋa Alexander Stubb toolâi saavâ:
”Já ko mun lam adelâm tii oovdâst juhlálii lopádâs, mun tipšoškuáđám taam tooimâ vyeligâžžân já kijttevâžžân. Vyeligâžžân ton oovdâst, et mun lam finnim väldikirje já ovdâsvástádâs taan čuuvtij vättee tooimân njuolgist Suomâ aalmugist. Mun riemâm tääl puoh navcâigijn já merideijee mieláin ovdediđ mii aalmug miänástume. Mun lopedâm porgâđ ávus, torvolii já aalmugijkoskâsii Suomâ oovdân. Mun lopedâm jyehi äigimuddoost piäluštiđ demokratia, sääni rijjâvuođâ já riehtistaatâ. Mun lopedâm kuldâliđ, savâstâllâđ já perustiđ. Mun lopedâm taištâliđ ton oovdân, et Suomâ lii puátteevuođâst-uv šiev eennâm. Maailm pyeremus eennâm mijjân syemmiláid.”
Stubb saavâ maŋa presidentkyevtis sirduin Ovdâskoddetáálu oovdân, kost Stubb tärhistij vuosmuu tove kunneekomppania.
Kunneekomppania tärhistem maŋa Stubb já Niinistö sirduin Presidentlaanan. Presidentkyevtis já sunnuu káálguh tiervâttii Kävppitorist čuážžoo ulmuid Presidentlane luptâstuvâst.
Loopâst president Stubb toolâi tieđettemtilálâšvuođâ Presidentlanneest já sirdui ton maŋa kálguinis virgevistásis.
Käldeeh:
– Näin presidentti Stubb aloitti tehtävässä (yle.fi)
– 11 majoitushuonetta, ruokasali ja oma saunaosasto – tällainen on presidentti Stubbin uusi koti (www.is.fi)
Kove: Juhani Kandell / Tasavallan presidentin kanslia