Syemmilâš 20-ihásâš Saga Vanninen lii vuáittám pasepeivieehid MM-siilbâ nisonij viiđâ šlaajâ valdâlmist Glasgow hallikištoin. Vanninen čokkij viiđâ šlaajâst ohtsis 4 677 čyegisid, mii lii meiddei uđđâ Suomâ ulâttâs. Taat miitaal lii Suomâ nubbe miitaal MM-hallikištoin čoođâ aigij já siämmást meid vuosmuš nisonij miitaal. Vuosmuu miitaal vuoitij kuulauigâdeijee Mika Halvari, kote vuoitij kole Barcelonast ive 1995. Kole Glasgowist viiđâ šlaajâ valdâlmist vuoitij 4 773 čuággáin belgialâš Noor Vidts, kote vuoitij jo nube tove MM-kole maŋaluvâi. Proonsi vuoitij Vuáládâhenâmij Sofie Dokter 4 571 čuággáin.
Vannisii miitaal ivne visásmui majemuu šlaajâst, 800 meetter kaččâmist, mast sun poođij kávcádin jieijâs persovnlijn ulâttâssáin aigijn 2:20.54.
Vuosmuu šlaajâst, 60 meetter äiđikaččâmist, Vanninen poođij nubben Ovtâstum staatâi Chari Hawkins maŋa. Vannisii äigi 8:33 lâi čiččâdin pyeremus.
Alodâhnjuškiimist Vanninen lâi kuálmád puátusáin 1,79 m. Suu ovdiibeln láin Bianca Salming puátusáin 1,82 m já Belgia Noor Vidts puátusáin 1,79 m.
Kuulauigâdmist Vanninen finnij puoh pyeremuu puáttus, já sun pajanij taan šlaajâ ääigi njunošsajan kuulmâ šlaajâ maŋa. Vanninen jieš muštâlij, et sust lâi taan maŋa šiev fiilis kišto ovdánmist.
Kukkodâhnjuškiimist sun njuškij 6,41 m, já tain puátusáin sun lâi šlaajâst nubbe. Suu ovdiibeln lâi belgialâš Vidts, kote njuškij majemuin njuškimkerdijn 6,50 m.
Vanninen muštâlij Yle TV -sahhiittâlmist, et äiđikaččâmist suu vuolgâ ij lam hirmâd pyeri já et alodâhnjuškim luhostui pyereest. Eres šlaajah lijjii suu mielâst vuáđušlaajah, já 800 meetter kaččâmist sun irâttij visásmittiđ mitalis. Taan šlaajâst Vanninen kaačâi jieijâs ulâttâs 2:20.54 já lâi káávcád.
Vanninen lii meid kulmii väljejum ive nuorâ valastâllen.
Käldee:
– MM-hopeaa! Saga Vanninen, 20, räväytti jymypaukun – moninkertaista urheiluhistoriaa (yle.fi)
Kove: Erik van Leeuwen (Wikimedia Commons)