Taažâ kunâgâs Harald lii puáccám luámus ääigi Malesiast já karttâm pyecceiviäsun infektio tiet. Taažâ kunâgâslonnjâ tieđettij ääšist majebaargâ.
Taažâ kunâgâsloonjâ mield kunâgâs finnee tipšo sehe malesialii já taažâ tipšopargovievâst. Sun tipšoo Sultanah Malihai pyecceiviäsust Langkawi-nommâsii suollust.
Kunâgâs teevdij 87 ihheed moonnâm ohhoost. Ton kunnen sun toovâi luámumääđhi olgoenâmáid, kost sun ááigui viettiđ šoddâmpeeivis.
Taažâ uđâslostâ VG mield ij lah vises, kuás kunâgâs piäsá meddâl pyecceiviäsust já máccá Taažân.
Taažâ uáiviminister Jonas Gahr Støre lii tuáivuttâm kunâgâsân, et sun puáráničij forgâ.
− Lii vaidâlittee kuullâđ, et kunâgâs Harald lii karttâm pyecceiviäsun Malesiast. Mun halijdâm tuáivuttiđ Haraldân, et sun puáráničij jotelávt, já tuáivum, et sun lii forgâ oppeet tiervâs, eeđâi Støre NTB-uđâstoimâttâhân.
Kunâgâs Harald lii puáccám moddii majemui aaigij. Taan ive uđđâivemáánu loopâst sun lâi muáddi peeivi puoccâmluámust vuoiŋâmuáli-infektio tiet. Meiddei moonnâm vyesimáánust sun kaartâi pyecceiviäsun infektio tiet.
Harald lii lamaš Taažâ kunâgâs ive 1991 rääjist.
Käldeeh:
– Kongen innlagt på sykehus i Malaysia (www.nrk.no)
– Kongen innlagt på sykehus i Malaysia – med infeksjon (www.nrk.no)
– Norjan kuningas Harald joutui sairaalaan Malesiassa (www.hs.fi)
Kove: Jørgen Gomnæs / The Royal Court (cropped)