Tave-enâmij rääđi muusik­palhâšume vyeitten 13 iävtuk­kâssâd, fáárust paje­kielâ­liih Dajan já Eatnama váibmu

Moonnâm oho majebaargâ almottuvvojii taan ive iävtukkâsah Tave-enâmij rääđi muusikpalhâšumán. Ive 2026 iävtukkâssân láá 13 nuottâtyeijid ohtsis 15 nuotâsteijest pirrâ Tave-enâmij. Tuojij šlaajah láá maaŋgâlágáneh: elleekovemuusikist ruánááeennâmlii elektronlii muusikân. Iävtukkâssân lii meiddei tanskalii nuotâsteijee Jeppe Ernst tyeji Solo (Cantus II), mast iä lah jienah ollágin.

Jyehi Tave-eennâm uážžu asâttiđ kyehti iävtukkâs. Ton lasseen Färsuolluuh, Ruánááeennâm já Åland uážžuh asâttiđ oovtâ iävtukkâs. Veikkâ Säämist ij lah máhđulâšvuotâ iävtuttiđ kiämmán, taan ive fáárust láá kuittâg kyehti pajekielâg nuottâtyeje: Suomâ nubben iävtukkâssân lii Hildá LänsmanTuomas Norvio vuosâalbum Dajan, Ruotâ nubben iävtukkâssân vist Britta Byström ooppera Eatnama váibmu.

Ive 2025 almostum Dajan lii Hildá Länsman já Tuomas Norvio vuossâmuš ohtâsâš album. Länsman já Norvio pittáin ovtâstuveh tavesämmilâš juoigâmärbivyehi já elektronlâš jienâenâdâh. Tain šoodâi aaibâs jiešlágán, eklektlâš (sierâ stiijlâin vaiguttâsâid ovtâstittee) šlaajâ. Länsman já Norvio lává jieš muštâlâm, ete sunnuu skiärru lii oovtmanolâš savâstâllâm ärbivyevi já teknologia kooskâst, ulmuu já maašin kooskâst sehe eennâm já šleeđgâ kooskâst.

Ruátálâš nuotâsteijee Britta Byström lii ráhtám maailm vuossâmuu pajekielâg ooppera Eatnama váibmu oovtâst tavesämmilijn kirje- já čaaitâlmčällein Rawdna Carita Eirain. Ooppera lii stivrim tavesämmilâš nuotâsteijee já stivrejeijee Elle Márjá Eira. Maailm vuosâeehid lâi skammâmáánu 15. peeivi 2025 Ruotâ kunâgâslii oopperast Tukholmast.

Tave-enâmij rääđi muusikpalhâšume juáhhoo jyehi nube ive artistân teikkâ artistjuávkun já jyehi nube ive kiännii nuotâsteijee nuottâtuáján. Taan ive muusikpalhâšume vyeittee almottuvvoo roovvâdmáánu 20. peeivi Helsigist. Vyeittee finnee palhâšumepáccá já 300 000 Tanska ruvnâd (suullân 40 000 eurod).

Puoh iävtukkâsah

  • Färsuolluuh
    • Eli Tausen á Lavalet me cry
  • Island
    • Bergrún SnæbjörnsdóttirIntraloper
    • Ingibjörg TurchiStropha
  • Ruánááeennâm
    • Varna Marianne NielsenSila
  • Ruotâ
    • Britta Byström – Eatnama Váibmu
    • Per ”Texas” JohanssonDen sämsta lösningen av alla
  • Suomâ
    • Hildá Länsman & Tuomas Norvio – Dajan
    • Sauli ZinovjevMaailman kantaja
  • Taažâ
    • Ola KvernbergFlåklypa – fra Paris til pyramidene
    • Kristine Tjøgersen ja Benedicte MaursethElja
  • Tanska
    • GuldimundJeg venter i lyset
    • Jeppe Ernst – Solo (Cantus II)
  • Åland
    • HavsmörkerIlväder

Tuámmárkode vuáđustâsâid jyehi iävtukkâsâst puáhtá luuhâđ Norden.org siijđoin.

Kimberli Mäkäräinen

Käldee:
Tässä ovat Pohjoismaiden neuvoston musiikkipalkinnon ehdokkaat 2026 (www.norden.org/fi)

Kove: Norden.org

Kommenteh

Čääli komment

Čääli komment.
Čääli noomâd teehin.

Luuvâ meid

Uđđâsumos uđđâseh

UArctic-kongres 2026 puáhtá arktisii kuávlu puáttee­vuođâ hukse­jei­jeid oohtân Fär­suolluid

UArctic-kongres 2026 čuákkee vuod oohtân arktisii kuávlu totkeid, algâaalmugij ovdâsteijeijd, uáppeid já merideijeid. Kongres uárnejuvvoo vyesimáánu 26.–29. peeivi Tórshavn kaavpugist Färsuolluin. Kongres uárnejuvvoo jyehi...

Roland Garros ‑tennisturnam kištottâlloo eromâš tiileest Pariisist – Jannik Sinner lii kievrâmus vyeittee­iävtukkâs  

Taan ive nubbe Grand Slam ‑tennisturnam, Roland Garros, lii vuálgám joton pasepeeivi Pariisist. Stuárráámuuh vuárdámušah miänástusâst liäbbájeh tääl maailmlisto njunošist leijee Jannik Sinner ärdei...

Toimâtteijen suomâ­miäštár­kištoin Anarist: lávurdâh 11.4.2026

Muái Valtterijn merideen algâttiđ peeivi eelâšmin Säämi máttááttâskuávdáást (SMK). Pesseen sahhiittâllâđ kištoi orniimist Anne Tervaniemi, kote västid kištopurâdemvisteest. Sun muštâl, ete jieht puurâdmin ellii...

Sämitigge mieđeet ive 2026 kulttuur­palhâšuumijd Maire Saijetsân já Maarit Länsmanân – Palhâšumeh juáh­hojeh Anarist 29.5. já Ucjuuvâst 19.6.

Sämitige kulttuurlävdikodde juáhá ive 2026 kulttuurpalhâšume Aanaar já Ucjuuvâ 150‑juhleiivij kunnen aanaarlii Mihkku Elle Maire Saijetsân já ucjuvlii Rájájon Máretân, Maarit Länsmanân. Valjiimist tiäduttui...

Suomi.fist tiäđuh almos palvâ­lusâin tääl meid nuorttâlâš-, anarâš- já tave­sämi­kielân

Suomi.fi-nettipalvâlusâst kávnojeh tiäđuh nuorttâlâš-, anarâš- já tavesämikielân jo suullân 180 almos palvâlusâst. Siijđoin meid muštâluvvoo palvâlusâin, maid eereeb iärrás Digi- já aalmugtiätuvuáhádâh, Eellimvyeimikuávdáš, Kela...