Puijon Hiihtoseura ovdâsteijee Iivo Niskanen vuoitij Anarist SM‑kole almai 10 km ärbivuáválii čuoigâm koskâäigivuolgâkištoost. Niskasii vuáittuäigi 24.24,2 lâi koorâs, tastko siilbâ vuáittám Alexander Ståhlberg (IF Minken) poođij moolân 18,6 sekuntid hitásubbooht. Ståhlberg lâi kišto aalgâst puoh jotelumos, mutâ 5 km koskâäigisaajeest Niskanen moonâi suu lappâd.
Anarâš aavis koijâdij Niskasiist, magarin sust oroi čuoigâđ Anarist. Henna Tervaniemi sahhiittâlâi.
– Fiijnâ saje. Ovdil-uv lam iällám, mutâ uáli harvii. Suotâs, ete tääbbin láá tääl SM-kištoh, ko viehâ maaŋgâ saajeest liččii taan täälvi pááccám orniihánnáá-uv. Tääbbinhân šoŋŋâ lii nuuvt pyeri ko pasta leđe, Niskanen eeđâi.
Lávurduv já pasepeeivi kištoin čyeigee ij veltihánnáá vyerdi innig kole. Sun lâi jo pieijâm savehijdis vuárkán ovdil Aanaar kištoi.
– Paje lii lamaš kukke, já irâttâm vala piergiđ paijeelittáá räi, vâi piäsá huolâttemes mieláin viettiđ luámu. Mottoom kooskâst lam jo váhá luámust lamaš-uv. Peesâm talle čuággiđ vuoimijd vädis paje maŋa uđđâ pajan, taha pyere vuoiŋâstiđ, Niskanen muštâlij.
Pronssimitalist kištottâllui čuuvtij. Vuokatti Ski Team Kainuu ovdâsteijee Emil Liekari čuoigâi kuálmádin masa ubâ kišto ääigi já vala majemuu koskâäigisajan (9,1 km). Loopâst Ville Ahonen (Imatran Urheilijat) kuittâg lasettij liävtu já vaaldij proonsi aigijn 24.58,8. Liekari paasij loopâloopâst viđâdin ko Puijon Hiihtoseura nubbe čyeigee Petteri Koivisto moonâi meid suu lappâd. Koivisto iäru mitalân lâi 1,8 seekuunt.
Páihálijn valastâllein puoh pyeremus lâi aanaarlâš Pekka Tervaniemi, kote poođij čuáđádin aigijn 28.58,3. Avveellii Roope Äärelä puáđusin lâi 128. saje. Kuohtuuh ovdâstává Saariselän Loimu -seervi.
Niskasiist lii vala máhđulâšvuotâ vyeittiđ Suomâ Cup
Suomâ Cup oleskištoost Markus Vuorela (Jämin Jänne) lii ain njunošist, veikâ sun poođij-uv 10 km čuoigâmist esken čiččâmnubálovádin. Suomâ Cup majemuš kišto lii pasepeeivi 50 km čuoigâm. Vuorelast lii tääl 86 čyegisid eenâb ko Niskasiist, kote lii nubben. Oovtâ kišto vyeittimist finnee 100 čyegisid. Jis Niskanen vuáittá pasepeeivi, te Vuorela ferttee leđe ucemustáá 16:d, vâi sun pisoččij njunošist.
Käldee:
– Iivo Niskanen hiihti kympin SM-kultaa Inarissa – Superlupaus heitti mestarille haasteen (etusuora.com)
Ovdil Aanaar kištoi SM-mitaleh juáhhojii jo spriintist já rijjâ vyevi čuoigâmist
Paje 2025–2026 vuosmuuh SM-čuoigâmkištoh uárnejuvvojii Kuopiost uđđâivemáánu 9.–11. peeivi taan ive peln. Tobbeen ärbivuáválii spriinti SM-kole vuoitij almain Ike Melnits (Pohti Ski Team Pyhäjärvi) já nisonijn Katri Lylynperä (Vuokatti Ski Team Kainuu). Rijjâ vyevi 10 km čuoigâmist puoh pyeremuuh láin Markus Vuorela (Jämin Jänne) já Hilla Niemelä (Ikaalisten Urheilijat).
Kuopiost koolgâi kištottâllâđ meid parâspriintijn, mutâ korrâ puolâšij tiet toh macâttuvvojii. Parâspriintih uárnejuvvojii Suomâ Cup čuávuváá tábáhtuumeest Ruávinjaargâst njuhčâmáánu 28.–29. peeivi. Almai kolle moonâi Puijon Hiihtoseuran (Petteri Koivisto já Iivo Niskanen). Nisonij kole vaaldij Vantaan Hiihtoseura (Jasmi Joensuu já Eevi-Inkeri Tossavainen).
Käldeeh:
– Kuopion SM-hiihdot 2026 (etusuora.com)
– Rovaniemen Suomen Cup & SM-parisprintti 2026 (etusuora.com)
Artikkâlkove: Valtteri Valkeapolku