Aanaar SM‑kištoi vuosmuu peeivi Ikaalisten Urheilijat juhloi tublevuáitu nisonij 5 km ärbivuáválii čuoigâm koskâäigivuolgâkištoost. Hilla Niemelä vuoitij kole aigijn 13.16,0, já Krista Pärmäkoski vaaldij siilbâ aigijn 13.19,0. Kyevtis láin jyehi koskâäigisaajeest njunošist. Pronssimiitaal finnij Vuokatti Ski Team Kainuu ovdâsteijee Jasmin Kähärä, kote paasij Niemeläst 8,9 sekuntid.
SM‑kole lasseen Hilla Niemelä visásmitij meid Suomâ Cup miäštárvuođâ, veikâ toos kulá-uv vala pasepeeivi 30 km ärbivuáválâš čuoigâm kišto. Miäštárvuođâ palhâšummeen lii 5 000 €.
Onnáá peeivi kištoost paccii meddâl korrâ čyeigeeh Jasmi Joensuu, Johanna Matintalo já Kerttu Niskanen, kiäh lijjii jo‑uv puáccám teikâ lammâšum.
Käldee:
– Hilla Niemelä tykitti naisten vitosen Suomen mestariksi – Kukisti Krista Pärmäkosken sekuntitaistelussa (etusuora.com)
Niemelä: Čuoigâm Anarist lâi siämmáá koorâs ko muštim
Kollemitalist Hilla Niemelä muštâlij tobdoidis Anarâš aavisân palhâšumejyehim maŋa. Henna Tervaniemi sahhiittâlâi.
– Vuáittuhân njadda uáli jo pyerrin. Váhá räđittum tubdâmušah, mutâ lam kuittâg tuđâvâš taan piäiván, Niemelä eeđâi.
Niemelä uásálistij Aanaar SM-kištoid meid ive 2023. Návt sun valdâlij čuoigâm Juvduuvääri pegâlmâs kištosaajeest:
– Siämmáá koorâs ko muštim. Saaveehlättee lâi pyere oornigist. Luáháh láá ennuv, já toh láá ciägguseh.
Niemelä tuálvui puoh kirkkásumos miitaal servikyeimis Krista Pärmäkoski njune oovdâst. Ittáá viestâin suoi lává kuittâg siämmáá juávhust.
– Itten mist lii uáli pyeri viestâjuávkku. Mij vyelgip vyeittiđ Kristan-uv kole, Niemelä eeđâi.
Pasepeeivi nisonijn lii vuárust 30 km čuoigâm. Tast čyeigeeh čyeigih 10 km mohe kulmii. Ive 2023 Niemelä ij uásálistám Anarist 30 km kiišton, nuuvt ete tääl sun haalijd peessâđ čuoigâđ tom. Sun lii kuittâg čuoigâm 10 km mohe ohtii.
– Muu mušto mield tot lâi taggaar, ete luáháh tuše juátkojeh já juátkojeh. Mutâ tiäđust-uv tobbeen puátá meid vuáluskulij. Kale tast korrâ mokke šadda, mutâ luhhoost tot lii tuše kulmii, Niemelä eeđâi.
Pärmäkoski: Lávurduv viestâi ulmen lii kolle
Anarâš aavis koijâdij meid Pärmäkoski smiettâmušâid palhâšumejyehim maŋa. Henna Tervaniemi sahhiittâlâi.
– Pyereh láá tubdâmušah. Váhá paasij väividiđ, ete vuáittu lâi nyevt alda, mutâ suotâs ete moonâi servikuáimán, Pärmäkoski ilodij.
Pärmäkoski poođij puorijn mieláin čuoigâđ oppeet Anarân.
– Tääbbinhân lii mielâttes pyeri šoŋŋâ lopedum ubâ oholoopân. Kale lii suotâs čuoigâđ. Kištoi saaveehlättee lii viehâ koorâs, mutâ kalehân kištočyeigei taha pyere peessâđ čuoigâđ korrâ meccijd. Tot palvâl vissásávt puohháid, veikâ unohist-uv váhá taan muddoost, hárjánâm valastâllee muštâlij.
Tego Niemelä, meid Pärmäkoski vuárdá jo siämmáá juávhust čuoigâm. Njuhčâmáánu loopâst Suomâ Cup oovdeb tábáhtuumeest Ruávinjaargâst Ikaalisten Urheilijat -juávkku Pärmäkoski, Niemelä já Katariina Lonka táppájii kollekišto Ounasvaara Hiihtoseuran tuše kuovttijn tuháttâdoosijn.
– Tiäđust-uv itten peesâm Hillain siämmáá juávkun, te láá pyereh vuolgâsajeh. Suotâs vyelgiđ čuoigâđ viestâ. Tot Ruávinjaargâ táppu iilâšt. Kale mij irâttep puoh, vâi itten puáđus ličij nubijkulij, Pärmäkoski eeđâi.
Pasepeeivi 30 km čuoigâm lii Pärmäkoski karrieer majemuš kišto. Čyeigee jieijâs saanij mield iälšu ij lah innig aaibâs alemuu tääsist, mutâ kištovalastâllee jieggâ lii liijká ááimuin.
– Tiäđám, ete kulmâlov mätki lii talle koorâs taan peeivi vuáđuld. Mutâ oskom, ete talle puávtám jo navdâšškyettiđ. Jis oro tagarin, ete jiem aaibâs njunošsoojijn innig taistâl, te puávtám adeliđ olssân váhá áármu. Mutâ jurdám, ete kištovalastâllee kávnoo vala já addel puoh saaveehlättei, Pärmäkoski valdâlij.
Artikkâlkove: Valtteri Valkeapolku