Kaivoskriittinen Kansanliike uárnee kuovâmáánu 26. peeivi tijme 8.30 rääjist mielâčáittus Helsigist Taažâ ambassaad oovdâst. Koččâmušâst lii toorjâmielâčááitus protestáid, moh uárnejuvvojeh siämmáá ääigi Oslost Hartree Partners toimâttuv oovdâst.
Oovtâst Blue Moon Metals ‑finnoduvváin Hartree Partners ruttâd taažâ Nussir ASA já ton veškiruuki Tave-Taažâst Repparfjordist. Protestij ulmen lii vaiguttiđ Hartree Partnersân, mii taha lopâlii miärádâsâs ruttâdmist njuhčâmáánust. Taan ruđâttáá ruuki ij pyevti juátkiđ tooimâs.
Ive 2019 Nussir ASA finnij Taažâ staatâst toimâlove veškiruukin já meid love lyeštiđ ruukipasâttâsâid Repparfjord-vuonân, mii lii suojâlum aalmuglii tääsist tehálâžžân luosâčácádâhhân. Ruuki uhked vuonâ luándu já kuávlu sämisiärvusijd.
– Mij halijdep lopâttiđ taam já puoh ruukijd, moh tuššâdeh luándu já sämmilij eellimiävtuid pirrâ Tave-enâmij. Mij ep tuhhit tom, ete nuuvt kočodum ruánáá sirdâšume rikkojeh olmooš- já algâaalmugij vuoigâdvuođâid, Kaivoskriittinen Kansanliike čáálá Instagram-tilistis.
Nussir ASA lii irâttâm pieijâđ ruuki joton Repparfjordist jo 20 ihheed. Ruuki vuástálisteeh láá taištâlâm ton vuástá. Ive 2020 Nussir ASA toovâi sopâmuš veeški vyebdimist saksalijn Aurubis AG:in. Maŋeláá irâttâs kuittâg macâttij sopâmuš ovdâsvástádâslâšvuotâkoččâmušâi keežild. Ton mield ruukist ij lamaš sosiaallâš tuhhiittem.
Ive 2021 ruuki huksim aalgij uđđâsist, mutâ ton‑uv keerdi vuástálistem lâi nuuvt koorâs, ete huksim koskâldui. Ruuki vuástálistei tááhust hyenes lävkkin lâi tot, ete kesimáánust 2025 EU valjij ruuki strategisávt tehálâžžân haahhân. Ton áánsust ruuki finnee aavhijd, tego jotelub lopekieđâvuššâm. Strategisávt tehálij haavâi ulmen lii visásmittiđ tom, ete EU finnee tehálijd mineraalijd jieijâs tooimâ peht ige lah kieđâkeččee ovdâmerkkân Kiinast.
Helsig mielâčááitus álgá tijme 8.30 já nohá tijme 16. Kaivoskriittinen Kansanliike koččo ulmuid mielâčáittusân vuástálistiđ kolonialism já luándu hiävu.
Käldeeh:
– Ellos Riehpovuotna Long Live Riehpovuotna! (www.instagram.com)
– Kiistellyn kuparikaivoksen rakennustyöt alkoivat Pohjois-Norjassa – vastustajat eivät aio perääntyä (yle.fi)
Kove: Paasikivi (Wikimedia Commons)