Arktisij kuávlui ohtâsâš muusiktábáhtus Pan‑ArcticVision uárnejuvvoo kuálmád keerdi. Ive 2023 vuáđudum tábáhtus koččo arktisijd muusiktaidârijd já arktisii kulttuur ustevijd skammâmáánu 29. peeivi Iqaluitân, Nunavut territorio uáivikaavpugân Kanada tavenuorttân.
Pan-ArcticVision ulmen lii ovtâstittiđ arktisij kuávlui aalmugijd muusikáin. Tom uárnee taveaašijd kieđâvuššee ornijdâh Nordting. Tábáhtusân uásálisteh ulmuuh já ornijduvah Säämist, Färsuolluin, Islandist, Ruánááenâmist, Ovtâstum staatâi Alaskast, Kanada tavekuávluin já ”Ruošâ arktisij patâreijei” juávhust.
Taan ive taidâreh láá Quinn Christopherson (Alaska), Yungmiqu (Ucjuuhâ), Dóttir (Färsuolluuh), Saina (Jakutia, Ruoššâ), Geðbrigði (Island), Linus Johnsen (Taažâ), Kimmernaq & HH (Ruánááeennâm), NTÏV (Ruotâ) já Shauna Seeteenak (Nunavut, Kanada).
Pan-ArcticVisionân halijduvvojeh oovdânpyehtimeh, main uáinojeh páiháliih kielah já kulttuureh já moh kieđâvušeh páihálijd já taveaašijd. Eresnáál ko ovdâmerkkân Euroviisuin, pooliitliih fáádáh láá lováliih já meid tuáivuttetteeh.
Keččeeh uážžuh jienâstiđ vyetteid maaŋgâ luokkaast. Toh láá Puoh arktisumos laavlâ, Puoh uđâsmielâlumos laavlâ, Puoh enâmustáá siärvuslâšvuođâ tobdo adeleijee laavlâ sehe Arktisâš kuávlu, mii áánsáš orniđ puáttee ive Pan-ArcticVision.
Suomâ peln tábáhtusân láá uásálistám Áilu Valle já Aleksi Niittyvuopio ive 2023 Čäcisuollust Tave-Taažâst já Talonpoika Lalli ive 2024 Ruánááeennâm uáivikaavpugist Nuukist.
Käldee:
– https://www.panarcticvision.org/
Kove: Pan-ArcticVision (Wikimedia Commons)