Poolis já Jotolâhtorvo olášuttii čohčâmáánu loopâst torvopiergâskocceem čiččâm päikkikoddeest peivikiäjui aldasijn. Iänááš vaanhimeh onnii huolâ tast, ete párnááh mađhâšeh auto sáátust olmânáál. Kocemist ittii kuittâg meid čuolmah.
Kocemist käävci prosentid párnáin mađhâšii ollásávt torvopiergâsijttáá. Sist ij lamaš torvopoovijgin.
– Mun jiem ibbeerd, lii-uv koččâmušâst peerustmettumvuotâ vâi juurdâšmettumvuotâ, mutâ pärttitiileest hadde lii koorâs. Paifakkist kooccâm sáttá tovâttiđ párnážân jiegâvaarâ, jis sun ij lah kiddâ torvopeeŋkâst. Párnáást lii vuoigâdvuotâ mađhâšiđ torvolávt. Toh vaanhimeh, kiäh visásmiteh tom jyehi peeivi, ánsášeh kijttosijd, iätá Jotolâhtorvo ohtâvuotâhovdâ Eini Karvonen.
Kocemist huámášui meid, ete tain vuálá 4-ihásijn párnáin, kiäin lâi torvopiergâs, tuše peeli mađhâšii selgi moonnâmsuundán.
– Selgi moonnâmsuundán mađhâšem auto monnjâpeeŋkâst lii puoh torvolumos muulsâiähtu párnážân. Párnáá uáivi lii lussâd já niske lii herkki. Máhđulii suoččâmist toh finnejeh puoh pyeremuu torjuu taggaar peeŋkâst, mast selgi lii moonnâmsuundán, Karvonen muštoot.
Vuálá 135 cm kukkosii párnáást ferttee leđe olmâ torvopeŋkkâ
Laavâ mield páárnáš ferttee kevttiđ olmâ torvopeeŋkâ autost maađhâšdijnis ton räi, ete sun lii 135 cm kukkosâš. Vuálá 3-ihásâš páárnáš ij uážu kuássin mađhâšiđ persovn-, pakkeet‑ tâi kyermiauto sáátust torvopiergâsttáá.
Jotolâhtorvo kuittâg avžut, ete páárnáš čokkáá torvopeeŋkâst 150 cm kukkoduv räi já selgi moonnâmsuundán ucemustáá ton räi, ete sun lii 4‑ihásâš.
Käldee:
– Osa lapsista matkustaa autossa ilman minkäänlaista turvalaitetta (www.liikenneturva.fi)
Kove: Skica911 (Pixabay)