Jo nuuvt kuhháá ko mun muštám, Avveel já Aanaar kooskâst lii lamaš stuorrâ jotteemvädisvuotâ: Avelist Anarân ij lah jottáám maggaargin iiđeedvuáru toin naalijn, et iđedân ličij kiergânâm Anarân paargon. Áinoo máhđulâšvuotâ lii lamaš jotteeđ jieijâs autoin. Tääl Aanaar kieldâ lii algâttâm ive pištee iskâstem, nuuvt et Avelist piäsá Anarân jo iđedist linjášautoin. Mun eellim uápásmuumin vuosmuu vyeijimvuárun porgemáánu 11. peeivi.
Uđđâ linjá lii uáivildum puoh mađhâšeijeid, kiäh tarbâšeh sáátu. Tot suápá eromâš pyereest Avveel–Aanaar kooskâ jottee pargeid, uáppeid já mađhâšeijeid. Puoh liipuh láá vyebdimist Mätkiaitârduv ”Reitit ja Liput” -moobiilheiviittâs peht 8.8.2025 rääjist. Särjiliipuid puáhtá uástiđ heiviittâsâst jo-uv 44 máátkán teikâ 28 máátkán. Liipuh láá vyeimist 90 peivid äššigâs valjim älgimpeeivi rääjist. Ovtâskâs liipuid puáhtá uástiđ heiviittâsâst já buusist. Uáppeeh, iäláttâhulmuuh já suáldátteh finnejeh määđhist 25 prooseent vuáládâs. Vuálá 4-ihásiih párnááh joteh nuuvtá vuorâsulmuin.
Uđđâ vuárui äigitaavluh
Eskelisii Lapin linjat vuájá tääl 11.8.2025 rääjist jyehi argâpeeivi Avveel já Aanaar kooskâst. Linjášauto vuálgá Avveel Tiärmásiist kirdemkiedi luoddâratkuuttuvvâst, já tot vuájá Avveel linjášautosajattuv já Aanaar K-market peht Säämi máttááttâskuávdážân. Linjášauto ooroost táárbu mield puoh orostuvâin já meid Saijoos puotâ. Äigitaavluh orostuvâi mield láá uáinusist Mätkiaitârduv siijđoin www.matkahuolto.fi.
Uđđâ linjá jotá iđedist čuávuvávt:
Avelist Anarân:
- 7:40 Tiärmás, kirdemkiedi luoddâratkuuttâh
- 7:50 Avveel linjášautosajattâh
- 8:25 Aanaar K-market
- 8:35 Säämi máttááttâskuávdáš
Anarist Avelân:
- 15:55 Säämi máttááttâskuávdáš
- 16:00 Aanaar K-market
- 16:40 Avveel linjášautosajattâh
- 16:50 Tiärmás, kirdemkiedi luoddâratkuuttâh
Maht vuosmuš mätki moonâi?
Mun njuškejim sáátun Avveel kirho puotâ. Mun, kote jođám linjášautoin uáli harvii, kolgim vistig muštástâllâđ, kogobeht tot orostâh lâigin. Mut tom ko kavnim, te puoh moonâi pyereest. Linjášautost lâi muu lasseen ohtâ mađhâšeijee: sun lâi Säämi máttááttâskuávdáá máttáátteijee Soile Törmänen, kote uážui kunnee leđe taan vuáru vuosmuš mađhâšeijee. Sun áigu kevttiđ taam vuáru ennuv pargomađhijdis jotemist. Sun vuárdá, et ulmuuh kevttih taam vuáru eenâb-uv. Säämi máttááttâskuávdáá uáppeeh iä lam vala vuosmuu peeivi joođoost, tastko sii škovlâ aalgij esken čuávuváá peeivi.
Muu uáinust iiđeedvuáru tuáimá eromâš pyereest. Áinoo, maid mun smietâm, lii maccâm Avelân ehidispeeivi. Tagarij peivij, kuás lii eehidláá pargo Anarist, linjášauto-ohtâvuotâ ij heivii äigitavluid. Nubij kulij adai Avelist Anarân kale piäsá maŋeláá-uv ehidist. Munjin persovnlávt ideaallâš ličij vala ohtâ eehidvuáru Anarist Avelân – taggaar, mii vuálgáččij veik čiččâm suulâin Anarist. Tuáivu mield tot-uv motomin puáđáččij, te tot vissásávt kepidičij jotoluv Avveel já Aanaar kooskâst.
Mun, kote jiem oomâst jieččân auto ollágin pic vuájám láiguautoin talle ko vuájám, tiäđust-uv tuáivum, et uđđâ linjášauto-ohtâvuođâ keežild jiem tarbâšiččii laiguuttiđ auto nuuvt ennuv ko ovdil. Linjášauto lii čuuvtij häälbib ko láiguauto, mut tiäđust-uv linjášauto äigitaavluh láá čovgâdeh, já jieijâs autoin vyeijim addel njyebžilvuođâ jotteeđ eidu talle ko jieš haalijd. Taam viekkiistâllâm mun persovnlávt ferttiim tääl toohâđ, kuábáš te kannat kuhheeb ääigi uáinust.
Mun tuáivum, et eres-uv kieldâ ässeeh tieđettiččii pehtilávt jieijâs jotteemtáárbuin, nuuvt et Aanaar kieldân finniiččij tuáimee almolii jotoluv já eres jotolâh kiäppáničij. Ideaallii tiileest aainâs-uv buusih hurgettiččii kyevti siijdâ kooskâst já toh jođáččii távjá. Mun avžuum iärásijd-uv kevtiškyettiđ uđđâ linjášautovuáruid – ton tuoivust, et uđđâ ohtâvuotâ pisoččij kuhháá, ko tot kerd lii tääl viijmâg puáttám já aalgân pieijum.
Käldee:
– Liikenneyhteydet (www.inari.fi)
Uđđâs peividem 14.8.2025: Lasettum: Linjášauto ooroost meid Saijoos puotâ táárbu mield.
Kove: Marja-Liisa Olthuis