Almosvalastâllâm vuálá 20-ihásij EM-kištoh uárnejuvvojii porgemáánu 7.–10. peeivi Tamperest Ratina stadionist. Suomâ valastâlleeh vuoittii ohtsis čiččâm mitalid (4 siilbâ já 3 proonsi), mii lii Suomâ stuárráámus miitaalmeeri 2000-lovvoost.
Enâmustáá mitalijd vuoittii italialiih, kiäh kuoddii pááikán kuttâ kole, kulmâ siilbâ já vittâ proonsi ađai 14 mitalid. Meiddei espanjalij saalâsin lijjii 14 mitalid, mutâ ko tom verdid Italian, te ohtâ kollemiitaal lonottui pronssimitalân. Ovtâstum kunâgâskodde vuoitij 13 mitalid (5+7+1), já Saksa vist vuoitij 10 mitalid (3+6+1). Ohtsis 17 enâmid 25:st finnejii aainâs-uv oovtâ kollemiitaal.
Vástuppeeivi
Kuulauigâdeijee Aatu Kangasniemi finnij Suomâ vuosmuu miitaal. 20,82 meetter uigâdem puovtij siilbâ. Kolle vuoittui 21,07 meetter uigâdmáin, mon tyehin lâi vuáládâheennâmlâš Jarno van Daalen. Puola Jakub Rodziak vuoitij proonsi (19,38 m).
Kangasniemi vuoitij nube-uv miitaal, ko sun šlivgij proonsi (74,41 m) já Mico Lampinen vist siilbâ (74,67 m) movgáráin. Uŋgar Armin Szabados kollešlivgim kiirdij joba 82,91 meetterid.
Lávárduv
Rebecca Nelimarkka vuoitij säittišlivgim siilbâ, ko suu viiđâd šlivgim uulâi 54,43 meetterân. Miäštárin šoodâi Kroatia Vita Barbic (55,26 m). Proonsi finnij Liettua Orinta Navikaite (54,36 m).
Pinja Kärhä vuoitij movgáršlivgim proonsi. Suu pyeremus šlivgim kiirdij 66,07 meetterid. Nubben poođij Ranska Marie Rougetet (67,38 m) já vuosmužžân vist Saksa Nova Kienast (67,93 m).
Pasepeeivi
Ella Mikkola vuoitij siilbâ alodâhnjuškiimist. Sun njuškij 189 cm aloduv majemuin keččâlmijnis. Kole vuoitij Uŋgar Lilianna Bator, kote še njuškij 189 cm, mutâ jo nubbijn iirâtmáin. Pronssi moonâi Espanja Ona Bonetân.
Enni Virjonen vuoitij proonsi čiččâmvaldâlmist. Sun čoogij 6 060 čyegisid, mii lii 200 čyegisid eenâb ko suu ovdebâš ulâttâs. Čiččâmvaldâlmist kole vuoitij Kroatia Jana Koscak (6 293) já siilbâ vuoitij Uŋgar Sarolta Kriszt (6 251).
Käldeeh:
– Suomelle mojova potti nuorten kisoista – Yle seurasi U20 EM-kisoja Tampereella (yle.fi)
– European Athletics U20 Championships – Medals Table (www.european-athletics.com)
Kove: Sportknowledge1 (Wikimedia Commons)