Volkswagen uáiná vuobdum autoi mere kiäppánmin. Taan ive Saksa stuárráámus autovalmâšteijee lii vuábdám 6,5 miljovn autod. Taat lii nelji prooseent ucceeb ko siämmáá ääigi tijmá.
Meiddei firma vuáittu ij lah olláám ovdii táásán. Ive kuálmád niäljádâs ääigi vuáittu lâi 42 prosentid ucceeb ko siämmáá iheniäljádâsâst ive 2023. Vuosmui oovce mánuppaje ääigi ive 2023 Volkswagen-firma vuáittu lâi pajeláhháá 16 miljardid. Taan ive tot lii ucceeb ko 13 miljardid.
Tiätu hiäjub vuáitust sáttoo puáttiđ ááigán, kuás pargei kooskâst lii jo huolâ fabrikij máhđulii kiddiimist. Volkswagen ij vala taam nonnii, mut tot lii kuittâg almottâm stuorrâ reorganisistmist. Firma kuittâg tieđeet, et taah uđđâ numereh láá aggân vuáđulub šeštimân.
Volkswagen tieđeet, et tot kámppádâl ollâ pälkkikoloigijn Saksaast. Ton suujâst Volkswagen lii luoppâm ovdebáin saksalâš pargei pargotäähidmijn. Irâttâs ij meid ááigu tevdiđ Saksa áámmátlito čiččâm prooseent pälkkivátámâš. Volkswagen tuáivuččij, et tot pargoviehâ, mii páácá reorganisistem maŋa, luovâččij tiätu oosijn pälhistis.
Saksalâš politiik čuávu Volkswagen ovdánmijd uáli tárkká. Littokansler Scholz iätá, et pargeeh iä kuittâg koolgâ kierdâđ hyenes haldâšem keežild. Saksa Volkswagen-fabrikijn láá suullân 300 000 parged.
Käldee:
– Volkswagen verkoopt minder auto’s en ziet de winst flink terugvallen (nos.nl)
Kove: René Hesse (Pixabay)