Nubbe-uv geeninubástittum šave vááimu finnim almai lii jáámmám

Nubbe-uv olmooš, kote finnij vááimusirdemist geeninubástittum šave vááimu, lii jáámmám. Baltimorest leijee Maryland ollâopâttuv talhâstieđâlii kuávdáá mield ameriklâš Lawrence Faucette jaamij masa kuttâ oho čuopâdâs maŋa. Sun čuopâdui čohčâmáánu 20. peeivi. Sun kiergânij tevdiđ 58 ihheed.

Lawrence Faucette lâi nubbe olmooš maailmist, kiäs pieijui šave váimu. Vuosmuš olmooš lâi 57-ihásâš David Bennett, kote kaartâi pyecceiviäsun kyehti ive tassaaš jiegâ äštee váimuvave keežild, já sun jaamij kyehti mánuppaje ton maŋa ko sun lâi finnim geeninubástittum šave vááimu.

Bennett jäämmim maŋa tutkui, et šave vááimun lâi njuámmum šahevirus. Faucette vist jaamij toos, et suu roppâ hilgoškuođij šave vááimu, pyecceiviäsu muštâlij. Suoi kuohtuuh iävá innig peessâm ulmust luovâttum vááimu sirdemân tondiet ko suoi láin meendu illáelen.

”Mij murâštep Faucette monâttem. Sun lâi merhâšittee pyecceiviäsu äššigâs, tieđâalmai, merâvuoimij veteraan já perruu eeči, kote halijdij tuše viettiđ eenâb ääigi kálguinis, olgijdiskijn já perruinis”, eeđâi vááimu sunjin sirdám tuáhtár.

Vuosmuu mánuppajan iä vuottum meerhah tast, et suu roppâ ličij hilgomin šave vááimu. Tot tooimâi pyereest, muštâl Maryland ollâopâttuv talhâstieđâlâš kuávdáš. Faucette finnij fysioterapia já hárjuttâlâi väzzim, mut maŋeláá ittii meerhah vááimu hilgomist.

Faucette kálgu eeđâi ovdil vááimu sirdem, et sunnust iä lam magarehkin stuorrâ tuoivuuh. Suoi tuáivoin tuše lase ääigi toos, et suoi liččijn puáhtám čokkáđ olgoviäskárist já juuhâđ käähvi oovtâst, čáálá The New York Times -lostâ.

”Lawrence Faucette majemuš tuoivâ lâi, et mij opâččijm taan fiäránist nuuvt ennuv ko máhđulâš, vâi iäráseh-uv uážuččii máhđulâšvuođâ uđđâ vááimun talle ko olmoošorgaan ij lah finniimist. Sun muštâlij tuáhtárij já pyecceitipšoi tiimin, et sun rähistij sii puohâid. Mist lii suu ahheev.”

Nubbe tuáhtár iätá, et sun lii kijttevâš tast, et sij pyehtih juátkiđ ton ovdedem, et ksenotransplantaatioh adai orgaanij sirdemeh šlaajâst nuubán liččii máhđuliih. Tom siämmáá meid Faucette jieš tuáivui, suu kálgu lâi muštâlâm kállás jäämmim maŋa. ”Sun tieđij, et sust ij lam innig ennuv äigi miigijn, já et taat lâi suu majemuš máhđulâšvuotâ porgâđ maidnii iärásij pyerrin”, suu kálgu eeđâi ciälkkámušâstis.

Käldeeh:

– In Memoriam: Xenotransplant Patient Lawrence Faucette (www.umms.org)

– Tweede patiënt met varkenshart overleden: ’Ervan leren was zijn laatste wens’ (nos.nl)