Sämitiggevaaljah uárnejuvvojeh puáttee čoovčâ (4.9.–2.10.), já ovdil tom Sämitige vaaljâlävdikodde aasât love argâpiäiván, 20.–31.3., vaaljâluvâttâllâm uáinimnáál. Vaaljâluvâttâlmân puáhtá uápásmuđ argâpeivij tijme 14–17.
Sämitige päikkisiijđoi mield vaaljâluvâttâllâm lii uáinimnáál siämmáá ääigi Anarist, Ucjuuvâst, Iänoduvâst já Vuáčust. Anarist luvâttâlmân puáhtá uápásmuđ Sajosist Dollagáddi-visteest (Menesjärventie 2). Ucjuuvâst luvâttâllâm lii uáinimnáál sijdâtáálu Giisást (Utsjoentie 9), Hettaast Tuodâr-Laapi luándukuávdáást (Tunturi-Lapin luontokeskus, Peuratie 15), já Vuáčust tom puáhtá uáiniđ Vuáču škoovlâst (Ivalontie 8716). Lii meiddei máhđulâš uápásmuđ luvâttâlmân syeijejum šleđgâpoostâ peht.
Juáhháást lii máhđulâšvuotâ tärhistiđ jieijâs tiäđuid luvâttâlmist. Sämitige vaaljâlävdikode oovdânpyehtee čällee Sinikka Mäkinen muštâl, et keččâm tábáhtuvá oovtâst vaaljâlävdikode pargee mieldiorodijn, já keččee finnee pääihi alne tärhibijd ravvuid uápásmuumân. Keččee uážžu laađiđ vaaljâluvâttâllâm, mut tom ij uážu kuvviđ ige tast pyevti rähtiđ muuštonmiärkkumijd. Jis keččeeh láá eenâb pääihi alne, te tuše kyevtis luoštuv kejâdiđ luvâttâllâm siämmáá ääigi. Suoi iävá uážu sárnuđ koskânis kejâdem ääigi.
Lasetiäđuid vaaljâluvâttâlmân uápásmum várás kávná Sämitige vaaljâlävdikode siijđoin.
Käldee:
– Sämitige vaaljah 2023 (www.samediggi.fi)
Kove: Fabrizio Brecciaroli