Aanaar kieldâ, mii vuáđudui kesimáánu 25. peeivi 1876, juhlo taaijuv 150 ive kukkosii historjás. Juhleive várás nuuvt kieldâ, ton irâttâsah já seervih sehe kieldâ ässeeh uárnejeh jieškote-uvlágánijd tábáhtusâid.
Ohtâ ive stuárráámuin tábáhtuumijn lijjii moonnâm oholoopâ SM‑čuoigâmkištoh, maid meid Anarâš aavis čuávui tárkká. Ive njunošjuhle uárnejuvvoo eidu kieldâ šoddâmpeeivi 25.6.2026 Sajosist. Ohjelmist láá láávdástmeh, sahâvuáruh já Aanaar historjá kieđâvuššee kirje almostittem.
Cuáŋuimáánu loopâst puáhtá uásálistiđ eereeb iärrás tälvivuoggâkištoid já lávukonsertân.
Konsert Njuámmilcoskâs láávu kulen 17. peeivi
Aanaar kieldâ uárnee cuáŋuimáánust čohčâmáánun nuuvtá konsertijd láávuin pirrâ Aanaar. Orniimist láá fáárust Meccihaldâttâs, Wilderness Hotels já Säämi máttááttâskuávdáš.
Konsertijn puáhtá navdâšiđ páihálijn lávdásteijein, tulâstâlmist já savâstâlmist.
Vuossâmuu konsert tuálá Ánná Morottaja Njuámmilcoskâs láávu kulen 17.4. tijme 18. Láávun vuálgoo parkkisaajeest tijme 17.30. Säämi máttááttâskuávdáá mađhâšemsyergi uáppeeh fäälih láávust kiepâpánnukäähvi, kume sääpi já njälmipitá.
Čuovâkove-eehid Siidast 23. peeivi
Sämimuseo Siida já Aanaar kieldâ uárnejeh Siidast nuuvtá čuovâkove-eehid 23.4. tijme 17–18.30. Tobbeen láá čáittusist čuovâkoveh, maid ulmuuh skeŋkkejii keessiv 2025 uárnejum nurâmist. Skeŋkkejum čuovâkoveh ráhtojii digitaallâžžân Siida já Aanaar kieldâ arkkâduvváid. Čáitálduv lasseen toh annojeh juhleive ääigi sosiaallii mediast sehe uđđâ Aanaar-historjákirjeest.
Tälvivuoggâkištoh 19. já 25. peeivi
Kieldâ ässei tälvikuálástemtááiđuh mitteduvvojeh kuovttijn tábáhtussáin.
Rivdul sijdâservi ry uárnee 19.4. tijme 12–16 tälvivuoggâkišto Muddusjäävri jieŋâ alne Rivdul ovddii škoovlâ riddoost (Angelintie 696). Kištoin palhâšuvvojeh nelji pyeremuu uággoo jyehi juávhust: almain, nisonijn já vuálá 18‑ihásijn.
Aanaar irâtteijeeh ‑servi uárnee jieijâs kišto 25.4. tijme 10 rääjist Rááhájäävri láávu kulen. Ohjelmân kuleh uággum, ulmuid uápásmum já oovtâst savâstâllâm. Tábáhtus lii uáivildum puohháid, kiäh láá kiddiistum iirâtmist.
Säämi kielâkähviviäsu Aanaar kieldâtáálust 29. peeivi
Aanaar kieldâ uárnee Säämi kielâkähviviäsu 29.4. tijme 14–16 Aanaar kieldâtáálu kähvivisteest. Kielâkähviviäsuin ulmuuh pyehtih sámástiđ anarâškielân, tavesämikielân já nuorttâlâškielân.
Keesi ääigi Anarist uárnejuvvojeh eereeb iärrás juhleh sehe pyerástâllâm- já vandârdemtábáhtusah. Tun puávtáh uápásmuđ puoh almottum tábáhtussáid juhleive tábáhtuskalenderist.
Kove: Valtteri Valkeapolku