Geävrrie, maailm vuossâmuš videospellâ ummeesämikielân, lii almostum.
Spellâ maainâst sämiruumbust, mii lii kavnum Ranskaast. Kuhháá Säämist meddâl lamaš rumbu lii monâttâm vuoimijdis, já spellee pargon lii macâttiđ taid. Siämmást spellee uáppá kielâst já kulttuurist. Speelâ rumbu vuáđuduvá olmâ ruumbun, mii tolvui museon Raanskan 1700-lovvoost. Ive 2024 rumbu luoihâttui Ájtte-museon Ruotâ Juhâmohheest, já pargo ton pisováá maaccâtmân lii joođoost.
Mainâs lává čáállám Anna Nutti Wiandt já Sara Ajnnak. Ajnnak mielâst speelân ličij puáhtám kevttiđ ennuv eenâb-uv resursijd, mutâ sun lii kuittâg tuđâvâš puátusân.
– Tággáár spellâ ij lamaš talle ko mun lijjim nuorâ já ko halijdim oppâđ sämikielâ. Nuuvt ete tot, ete ubâ spellâ kávnoo, lii jo stuorrâ vuáittu muu mielâst, Ajnnak iätá.
Spellâ lii sarnum ollásávt ummeesämikielân. Ohtâ jienâčaittâleijein lii 16-ihásâš Aile Elvira Ajnnak, kote čaittâl Aina-nommâsii huáđđoo.
– Tobdoo uáli jo jiäráskitten já viehâ historjálâžžân, ete lii rahtum spellâ ummeesämikielân já ete tot muštâl tehálii ruumbust, sun iätá.
Spellâ lii uási stuárráb projektist
Geävrrie ovdedui N-LITE-projektist, mii finnee ruttâdem EU:st Northern Periphery and Arctic -ohjelm peht. Projektist láá fáárust aainâs-uv Region Västerbotten Ruotâ peln já Kajaani áámmátollâškovlâ KAMK Suomâ peln.
Geävrrie lii uási speelâst Tale Smiths. Spellâ fáálá mainâsijd já fiäránijd, moh vuáđuduveh Suomâ, Ruotâ, Taažâ, Irland já Färsuollui ärbivuovvijd. Geävrrie lasseen toos kulá eereeb iärrás fiäráán, mii kyeskee Kalevalan. Tale Smiths almostuvá tiäturân Steam-viermikäävpist.
Käldeeh:
– Lokala röster ger liv till nytt umesamiskt datorspel: ”En seger” (www.svt.se)
– Hon är en av rösterna bakom datorspelet ”Geävrrie”: ”Historiskt” (www.svt.se)
– Preserving Language Through Play: The World’s First Ume Sámi Computer Game in Development (www.interreg-npa.eu)
– Lansering av digital spelupplevelse (www.regionvasterbotten.se)
Kove: Region Västerbotten