2,6 kilomeetter kukkosâš Francis Scott Key -šalde koočâi meerân 26.3.2024 Ovtâstum staatâi Baltimorest. Lastâtamppâ suojâi šalde coggâstuálpun, mon keežild šalde koočâi.
Šalde lâi lamaš kiävtust 47 ihheed ovdil päärti. Baltimore šalde rastalditij Pataspcojuuvâ, já ton alne lâi ain ennuv jotolâh. Ubâ šalde ij koččâm meerân, mutâ stuárráámus uási tast.
Dali-nommâsâš lastâtamppâ lii 300 meetterid kukke, já tot vuolgij joton Baltimore hamânist Sri Lanka kulij. Tamppâ purjâstij Singapore liipu vyelni, já ton sáátust lijjii 22 parged.
Pärtti tábáhtui iho pel kyevti ääigi páihálii ääigi. Taampâ uigâmvyeimisysteem cuovkkânij já taampân šoodâi šleđgâpotkâ tuše muáddi miinuut ovdil šaaldan teivâm. Uigâmvyeimisysteem cuovkkânem já šleđgâpoođhâ keežild lastâtaampâ ij puáhtám innig stivriđ. The New York Times muštâlij, ete taampâst lijjii lamaš ovdil-uv vaigâdvuođah uigâmvyeimisysteemáin.
Taampâ pargoviehâ vuolgâttij Mayday-signaal jotelávt, já tot adelij lase ääigi virgeomâháid evakuistiđ šalde. Dali-taampâ luocci kočoi, ete haammânáákkár kalga lyeštiđ vuálus, te taampâ liähtu hiđoččij. Pargovievâ jotelis toimâm piäluštij maaŋgâid ulmuid.
Šalde alne lijjii käävci olmožid, ko tamppâ suojâi toos. Virgeomâhááh puohtii piäluštiđ kyehti sist. Lii arvâlum, ete kuttâ huksimpargee láá jáámmám päärtist. Uuhrij meeri ij lah kuittâg vala visásmittum, tastko kyehti huksimpargee lává ain-uv lappum. Riddovahtiittâh muštâlij, ete huksimpargei aktiivlâš uuccâm- já piäluštempargo lii nuuhâm.
Viehâ jotelávt päärti maŋa arvâlui, ete ličij-uv pärtti porgum tátulávt, ovdâmerkkân terrorism keežild. Baltimore poolishovdâ Richard Worley lii kuittâg ettâm, ete ij lah maggaargin tuođâštus toos, ete pärtti ličij porgum tátulávt. Ovtâstum staatâi president Joe Biden eeđâi meid siämmáánáál. Sun meid ceelhij, ete tábáhtus lâi “kavhâdis pärtti”.
Ovtâstum staatâi aalmuglâš jotolâhtorvolâšvuotâlävdikodde joođeet já juátká päärti tutkâm.
Käldee:
– Baltimore Key Bridge collapses after ship collision (edition.cnn.com)
Kove: NTSBgov (Wikimedia Commons)