Anarâškielâ servi já Wikimedia Suomâ uárnejeh Wikipedia-páájá Helsigist 31.10.–1.11. tijme 9–18. Juurdân lii čäälliđ, tivvoođ já tievâsmittiđ Wikipedia-artikkâlijd, savâstâllâđ Wikipedia-pargoost já siärvustâllâđ anarâškielân. Seervist pääihi alne lává Anarâškielâ seervi mediapargee Valtteri Valkeapolku já anarâškielâ ollâopâttâhlehtor Marja-Liisa Olthuis.
Páájá tuálloo Maria01-kampus 3‑rakânâsâst, Urban3-visteest. Čujottâs lii Lapinlahdenkatu 16 (nubbe kerdi). Ton lasseen pááján lii máhđulâš uásálistiđ meiddei káidusin Zoom peht. Tast ferttee kuittâg almottiđ muuneeld. Anarâškielâ servi tuáivu, ete meiddei tagareh ulmuuh, kiäh iä lah ovdil čáállám Wikipedian, puáđáččii fáárun.
Anarâškielâlâš Wikipedia šoodâi virgálávt roovvâdmáánu 19. peeivi 2020 tijme 15.07. Onne tobbeen láá 6 746 artikkâlid. Wikipedia-pargo ij lah tuše artikkâlij čäällim. Artikkâlij várás ferttee meiddei huksiđ infrastruktuur ađai luokkaid, myensterijd já modulijd. Jis luokah, myenstereh já moduleh váldojeh fáárun, te anarâškielâlii Wikipediast láá jo 30 456 sijđod.
Koččâmušâin já káidusuásálistem várás vääldi ohtâvuođâ Anarâškielâ seervi mediapargei (anaraslosta@anaraskielaservi.fi).
Tiervâpuáttim fáárun!
Kove: Čáittukove anarâškielâlii Wikipedia ovdâsiijđost, Valtteri Valkeapolku