Espanja lii vuáittám jyelgipáálu fiinaal já maailmmiäštárvuođâ 2026. MM-kištoi loppâspellâ Espanja–Argentiina spellui New Jerseyst pasepeeivi syeinimáánu 19. peeivi. Vyeittee čielgâi esken nube jotkâääigi 106. minuttist. Taat maailmmiäštárvuotâ lii Espanjan nubbe. Vuosmuu keerdi Espanja speelâi maailmmiäštárin ive 2010. Argentiina piäluštij tääl jieijâs ovdebáá miäštárvuođâ ivveest 2022, já tast láá kyehti eres-uv miäštárvuođâ iivijn 1978 já 1986.
Espanja lii spellâm ubâ turnam eromâš pyereest: tot lii luáštám siisâ tuše oovtâ moolâ Belgia-speelâst. Espanja moolâvahtâ Unai Simón väljejui-uv tai MM-kištoi pyeremussân moolâvahtân.
Vuosmuš spellâpaje
Spellâ vuolgij uáli rávhálávt joton, mut vuosmuš spellâpaje nuuvâi molâittáá 0–0. Espanja haldâšij páálu já speelâi olssis maaŋgâid varâlijd soojijd, mut Argentiina piäluštâs já moolâvahtâ Emiliano Martínez tiptii haldâšeijee maailmmiäštár čovgâdávt speelâst.
Espanja teedij eromâšávt vuosmuu spellâpaje loopâst páálu Argentiina kiäčán. Dani Olmo já Nico Williams láin ubâ ääigi varâliih vollitmist, mut moolâ ij liijkágin šoddâm. Argentiina finnij uáli uccáá moolâsoojijd.
Nubbe spellâpaje
Espanja haldâšij nube spellâpaje. Tállân puudâ maŋa Alejandro Baena testai Argentiina piäluštâs, já maŋeláá Marc Cucurella peesâi varâlii pääččimsajan, mut Gonzalo Montiel kiergânij piäluštiđ páálu majemuu muddoost. Argentiina spelleekyevtis Leandro Paredes já Enzo Fernández finnijn fiskis koortâ korrâ tuárumij keežild. Fernández finnij kyehti fiskis koortâ já kaartâi kyeđđiđ kiedi. Argentiina kaartâi spellâđ luvvijn spellein speelâ loopâ räi.
Espanja luhostui ohtii finniđ páálu moolân, mut moolâ hilgui rikkomuš keežild. Speelâ loopâst Espanja teedij korrâsubbooht, mut puoh pááluh orostii Argentiina moolâvahtâ Emiliano Martínez čárváid.
Eidusii spellâmääigi maŋa spellâ lâi ain 0–0, já maailmmiäštárvuođâ čuávdim sirdui jotkâááigán. Speelâst kuohtuuh juávhuh piäluštii pyereest. Liijkágin eidusii spellâmääigist kuábáškin juávkku ij peessâm vuástálistes piäluštmist čoođâ.
Jotkâääigih
Vuosmuš jotkâäigi lâi eromâš čovgâd, mut tot še nuuvâi molâittáá.
Speelâ loppâpaje nube jotkâääigi lâi niärváidpuáldee. Viijmâg, jotkâääigi 106. minuttist, Lamine Yamal faalâi páálu Ferran Torrezân, kote paajij Espanja vuosmuu já áinoo moolâ. Taat lâi Espanjan eromâš ánsášum moolâ já siämmást meid ubâ turnam vuáittu.
Kove: Marja-Liisa Olthuis