Lávurduv Juvduuvääri čuoigâmstadionist Anarist viettui viestâpeivi. Nisonij 3×5 km viestâ loppâuásist šoodâi uáli jo jiäráskittee ko kolleest kištottâláin paldâluvâi Vilma Ryytty (TEHO Ski Team Iisalmi 1) já Krista Pärmäkoski (Ikaalisten Urheilijat). Ryytty vuoitij Pärmäkoski tuše 0,1 sekuntáin.
Ryytty lasseen vyeitteejuávkun kuullâv Nora Kytäjä já Silva Kemppi. Juávkku algâttij kišto luáttávâžžân toos, ete sij vyeittih kole.
– Tubdâmušah láá pyereh. Ulmen lâi Suomâ miäštárvuotâ, já tom mij vaaldijm, juávhu aŋkkur Ryytty muštâlij Anarâš aavisân.
Itten sii kulmâs vuárdá vala majemuš pargo, 30 kilomeetter mätki. Kulmâ ive tassaaš Ryytty poođij Anarist niäljádin. Kytäjä já Kemppi vist iävá lah vala čuoigâm määđhi Juvduuväärist.
– Tuáivup, ete tobbeen piäsá meddâl mahtnii. Taištâlemmieláin mij tohon vyelgip, nisoneh valdâlii ittáá peeivi.
Henna Tervaniemi sahhiittâlâi.
Kišto ovdánem
Nisonij viestân uásálistii 21 juávkkud. Vuosmuš uási čuoigui ärbivuáválijn vuovvijn, já kyehti čuávuváá uási čuáigojii rijjâ vuovvijn.
Vuosmuu uásist Ounasvaaran Hiihtoseura 1 ‑juávhu čyeigee Johanna Matinpalo vaaldij njunošsaje. Suu maajeeld poođij Ikaalisten Urheilijat ‑juávhu Hilla Niemelä. Meid Nora Kytäjä peesâi fáárun njunošjuávkun. Vuosmuu molsomist Matintalo vuolgâttij kyeimis Vilma Kanerva máátkán 26,1 sekuntid ovdil iärásij.
Nube uásist Ylivieskan Kuula čyeigee Anna-Kaisa Saari poorgâi stuorrâ pargo ko sun tuálvui juávhus káávcád saajeest já +50,3 sekuntist nubben nube molsomân, tuše 11,2 sekuntid Kanerva maajeeld. Katariina Lonka (Ikaalisten Urheilijat) poođij molsomân kuálmádin (+13,9) já Silva Kemppi niäljádin (+14,1).
Kuálmád uásist Ylivieskan Kuula aŋkkur Tiia Olkkonen ij luhostum pissoođ vuosmužžân, peic jo 1,8 km puotâ Pärmäkoski lâi čuoigâm njunošân. Ryytty (+1,8) já Josefiina Böök (Ounasvaaran Hiihtoseura 1) čuávuin suu. 3,1 km puotâ Ryytty lâi peessâm njunošân. Pärmäkoski moonâi vala ohtii suu lappâd já čuoigâi vuosmužžân moolânjuálgusân. Tot ij kuittâg rijttám aaibâs moolâ räi, peic Pärmäkoski juávkku ferttij tuuttâđ siilbân.
Pronssimiitaal oroi jo monâmin Ounasvaaran Hiihtoseura 1 ‑juávkun, mutâ Vuokatti Ski Team Kainuu aŋkkur Jasmin Kähärä čuoigâi juávhus paijeel miinutpele keččin kuálmád sajan.
Suomâ Cup viestâkišto puátuseh
Onnáá peeivi kuálmád saje áánsust Vuokatti Ski Team Kainuu (Katri Lylynperä, Selene Rossi já Jasmin Kähärä) pajanij Suomâ Cup viestâkištoost nube saajeest vuosmužžân já juhloi viestâcup vuáitu 632 čuággáin. Suomâ Cup viestâkišto eres palhâšumesoojijd pottii Vantaan Hiihtoseura (614), Iisalmen Visa (590), Ikaalisten Urheilijat (580), Ounasvaaran Hiihtoseura (570) já AT Ski Team (492).
Käldee:
– Vilma Ryytty kukisti Krista Pärmäkosken SM-viestin kultataistossa (etusuora.com)
Artikkâlkove: Valtteri Valkeapolku
Uuđâs peividum 11.4.2026 tme 19.44. Tivvum meid Ryytty nommâ (Vilma, ij Wilma tego uđđâsist ovdil luuvâi) sehe viestâ čuoigâmvyevih (uđđâsist luuvâi ovdil, ete ubâ viestâ ličij čuoigum ärbivuáválijn vuovvijn).