Sämitige kulttuurlävdikodde juáhá ive 2026 kulttuurpalhâšume Aanaar já Ucjuuvâ 150‑juhleiivij kunnen aanaarlii Mihkku Elle Maire Saijetsân já ucjuvlii Rájájon Máretân, Maarit Länsmanân. Valjiimist tiäduttui tot, mon ennuv palhâšume finnejeijeeh láá toimâm siärvuslâšvuođâ pyerrin.
Kulttuurpalhâšume mieđettuvvoo kulttuur tahhei tâi taidârân tubdâstâssân merhâšittee pargoost sämmilii kulttuureellim pyerrin. Palhâšume mieđettuvvoo usâhánnáá.
Palhâšume lii 5 000 eurod kuábbáá-uv finnejeijei.
Maire Saijets finnee palhâšuumees Anarist 29.5.
Maire Saijets kulttuurpalhâšume jyehimtilálâšvuotâ uárnejuvvoo 29.5. tijme 9–11 Säämi kulttuurkuávdáást Sajosist. Tilálâšvuotâ lii uási Säämi máttááttâskuávdáá kiđđâjuhleest, já tot lii puohháid áávus.
Maire Saijets (š. 1963) lii meddâl tuáijárperrust Aanaarjuuvâ Mihkku-pääihist Anarist. Sun lii čođâldittám Säämi máttááttâskuávdáást sämityeje eromâšáámmáttotkos, mon maŋa sun lii porgâm sämityeje máttáátteijen. Saijets oopâi jo pääihist anneeđ áárvust vaanhimij tyejitááiđu. Aalmugopâttuv já Säämi máttááttâskuávdáá kuursâin sun tuoijuuškuođij jieš-uv aktiivlávt já peesâi oppâđ sierâ amnâsijn rahtum tuojijd.
Anarâš aavis koijâdij Saijetsist, magarij jurduiguin sun váldá vuástá palhâšume.
– Puorijn mieláin, ko sämityeji puátá uáinusân já annoo áárvust.
Suuvâst já oovtâst porgâmist lii Saijetsân stuorrâ merhâšume. Tyeje puátteevuođâ sun uáiná pyerrin.
– Nuorâ suhâpuolvâ lii movtáskâm tyejeest já taan ubâ kulttuurist.
Maarit Länsman finnee palhâšuumees Ucjuuvâst 19.6.
Maarit Länsman kulttuurpalhâšume jyehimtilálâšvuotâ uárnejuvvoo 19.6. tijme 17 rääjist Onnela Törmäst Ohcejohka Šearrá ‑tábáhtus ohtâvuođâst. Tilálâšvuotâ lii puohháid áávus.
Maarit Länsman (š. 1944) lii meddâl Skadjanjárgast Ucjuuvâst. Sun lii valmâštum päikkitipšon já porgâm eellimpargoos päikkitipšon já peerâpargen Ucjuuvâst. Länsman lii kattim kulttuur já kielâ, já suu pargo merhâšume uulât kuhás maaŋgâ suhâpuolvân. Länsman lii iäláttuvâst.
Länsman muštâl Anarâš aavisân, ete sun lâi čuuvtij olâttum ko kuulij, ete sunjin mieđettuvvoo palhâšume.
– Lam meid uáli jo kijtolâš, tastko tiäđám, ete lam porgâm viehâ ennuv sämiaašij pyerrin. Párnááh já perruuh láá ain lamaš alda muu vááimu, Länsman iätá.
Anarâš aavis tuáivut ennuv luho Saijetsân já Länsmanân palhâšume tiet.
Käldee: Sämitige tiäđáttâs 20.5.2026
Kove: Riitta Orti-Berg (Maire Saijets) já Jonna Lähteenmäki (Maarit Länsman)