Ive 2024 Euroop union enâmeh kevttii áárvu mield 403,1 miljard eurod tutkâm‑ já ovdedempaargon (research & development, R&D). Loho lii 3,6 prooseent stuárráb ko ive 2023. Ko verdid ihán 2014, te tutkâm‑ já ovdedempaargon kevttum ruttâ lii pajanâm 62,2 prosentáin (248,6 miljard eurost).
Tutkâm‑ já ovdedempaargon kevttum ruuđâ uási bruttoaalmugpuovtâdâsâst pisoi ain suullân 2,2 prosentist tego ovdebái iivij‑uv. Euroop-rääđi lii asâttâm Euroop unionân ulmen, ete uási ličij kulmâ prooseent. Ive 2024 toos ulâttii tuše kuttâ eennâm: Ruotâ (3,6 %), Belgia (3,4 %), Nuorttâriijkâ (3,3 %), Suomâ (3,2 %), Saksa (3,1 %) já Tanska (3,0 %).
Čiččâm enâmid kevttii tutkâm‑ já ovdedempaargon ruuđâ tuše oovtâ prooseent tâi ucceeb. Taah enâmeh lijjii Luxemburg já Slovakia (kuohtuuh 1,0 %), Latvia (0,9 %), Bulgaria (0,8 %), Kypros (0,7 %) sehe Romania já Malta (kuohtuuh 0,5 %).
Kávpáliih finnoduvah kevttii oppeet puoh enâmustáá ruuđâ tutkâm‑ já ovdedempaargon. Toi uási oleslovvoost lâi 66,5 prosentid adai 268,1 miljard eurod. Ollâškovlim uási lâi 21,4 prosentid, haldâttuv uási 10,8 prosentid já almolávt ávhálij seervij uási vist 1,3 prooseent.
Käldee:
– EU spending on R&D exceeded €403 billion in 2024 (ec.europa.eu)
Kove: This_is_Engineering (Pixabay)