Ubâ maailm paijeelkulâttempeivi lâi moonnâm koskoho porgemáánu 2. peeivi. Paijeelkulâttempeivi meerhâš äigipuudâ, kuás rekinistmij mield ulmui kulâttem mana paijeel eennâmpáálu jyehi-ivváá ääpist pyevtittiđ luánduriggoduvâid. Paijeelkulâttem lii ohtâ merhâšitteemuin suujâin šoŋŋâdâhnubástusân já luándulappuumân. Paijeelkulâttempeivi lii rekinistum ive 1970 rääjist ain onnáá piäiván.
Paijeelkulâttempeeivih rekinistojeh meid sierâ enâmáid. Suomâst paijeelkulâttempeivi lii táválávt jo kiđđuv. Taan ive tot lâi njuhčâmáánu 31. peeivi. Ađai paijeelkulâttempeeivij äigipuudâi vuáđuld syemmiliih kulâtteh luánduriggoduvâid paijeel kuohtii jotelubbooht ko puoh enâmeh koskâmiärálávt. Sierâ enâmij já ubâ maailm paijeelkulâttempeeivijd ij pyevti verdidiđ aaibâs tievâslávt koskânis, mut kuittâg toh čäittih, ete Suomâst já eres ovdánâm enâmijn kulâttem lii stuárráb ko kievhibijn enâmijn, kost ij lah máhđulâšvuotâ kulâttiđ ko aaibâs velttidmettum pyevtittâsâid. Ive 2018 enâmustáá kulâtteijee enâmeh lijjii Qatar, Luxemburg já Ovtâstum arabiemiirikodeh. Riges oljostaatâ Qatarist paijeelkulâttempeivi lâi ton ive jo kuovâmáánu 8. peeivi. Stuárráábijn enâmijn paijeelkulâttempeivi lâi ton ive Ovtâstum staatâin njuhčâmáánu 15. peeivi, Ruošâst cuáŋuimáánu 21. peeivi, Saksaast vyesimáánu 2. peeivi já Kiinast kesimáánu 16. peeivi. Pyeremuuh enâmeh lijjii Vietnam, Marokko já Kirgisia, moi paijeelkulâttempeeivih lijjii eskin juovlâmáánu pelimuddoost tâi loopâst.
Käldeeh:
– Maailman ylikulutuspäivä on tänään – Suomen osuus ylikulutuksesta huomattavasti keskiarvoa suurempi (wwf.fi)
– Tässä ovat maailman suurimmat tuhlurit: 10 eniten luonnonvaroja kuluttavaa maata (www.mtvuutiset.fi)
Kove: Khaing Nyein (Pixabay)